भारतको पूर्वी बेङ्लुरुमा सामाजिक सञ्जालमा धर्मसम्बन्धी गरिएको एक आपत्तिजनक पोस्टविरूद्ध भएको प्रदर्शनमा प्रहरी फायरिंग हुँदा दुई जनाको मृत्यु हुनुका साथै कयौं मानिसहरू घाइते भएका छन्।
सामाजिक सञ्जालमा धर्मसम्बन्धी एक आपत्तिजनक पोस्टविरुद्ध प्रदर्शन गर्दै उक्त भीड प्रहरी स्टेशन पुगेको थियो।
आक्रोशित भीडले दुई प्रहरी चौकी र कांग्रेस विधायकको घरमा तोडफोड गरेपछि त्यहाँको प्रहरीले गोली चलाएको बताएको छ।
प्रहरीले भीडलाई नियन्त्रणमा लिन लाठीचार्ज तथा अश्रु ग्याँस प्रहार गरेको थियो।
झडपमा ६० प्रहरी पनि घाइते भएका छन्।
प्रदर्शनकारीले प्रहरी कार्यालयबाहिर राखिएको गाडीमा आगजनी गर्नुका साथै प्रहरी कार्यालयमा ढुंगामुढा गरेका थिए।
बेङ्लुरुका प्रहरी कमिश्नर कमल पन्तका अनुसार डिगे हल्ली र केजी हल्ली क्षेत्रमा कफ्र्यु लगाइएको छ।
प्रहरीका अनुसार एक सय १० प्रदर्शनकारीलाई प्रहरीले नियन्त्रणमा लिएको छ ।
पुलिकेशिनरका कांग्रेस विधायक अखण्ड श्रीनिवास मूर्तिका एक नातेदारले सामाजिक सञ्जालमा आपत्तिजनक पोस्ट राखेपछि यसको विरोधमा ठूलो संख्यामा मानिसहरू मंगलबार साँझ प्रहरी स्टेशन पुगेर उक्त पोस्ट राख्ने व्यक्तिलाई कारबाही हुनुपर्ने माग गरेका थिए।
उनीहरूले उक्त पोस्टले आफ्नो धार्मिक भावनामा चोट पुर्याएको भन्दै ती व्यक्तिविरूद्ध एफआईआर दर्ता गरेर कारबाही गर्न माग गरेका थिए।
प्रहरीले आरोपितलाई पनि नियन्त्रणमा लिएको बताएको छ। ती व्यक्तिको नाम नविन रहेको उल्लेख गरिएको छ।