कैलालीको प्रहरी हिरासतमा रहेका एक जनाको मृत्यु भएको छ।
धनगढी उपमहानगरपालिका वडा नम्बर १४ फूलबारीका अन्दाजी ४५ वर्षीय अमरबहादुर चन्दको प्रहरी चौकी फूलबारीको हिरासतमा मृत्यु भएको हो।
मदिरा सेवन गरी झैझगडा गरेको आरोपमा उनी पक्राउ परेका थिए।
चन्दको शव घाँटी काटिएको अवस्थामा शौचालयमा फेला परेको प्रहरीले जनाएको छ।
‘शौचालय जाँदाखेरी उनको मृत्यु भएको हो तर घाँटीमा काटिएको गहिरो घाउ छ,’ कैलालीका प्रहरी प्रमुख अनुपम शमसेर जबराले भने।
आज बिहान फूलबारी ‘सी’ गाउँमा रक्सी खाएर घरघरमा बन्चरो हान्न थालेको भन्ने सूचनाका आधारमा चन्दलाई प्रहरीले पक्राउ गरेको थियो।
शवको पोष्टमार्टमका लागि सेती प्रादेशिक अस्पताल ल्याइएको छ।
घटनाबारे अनुन्धानका लागि जिल्ला प्रहरी कार्यालय कैलालीका प्रहरी उपरीक्षक प्रतीक विष्टको नेतृत्वमा टोली खटिएको जबराले बताए।