चिकित्सकमा कोरोना संक्रमण पुष्टि भएपछि चितवनको रत्ननगरस्थित रत्ननगर बकुलहर अस्पतालले अकस्मिक, डाइलासिस र सुत्केरी बाहेकका सम्पूर्ण सेवा बन्द गरेको छ।
बुधबार गरिएको परीक्षणका क्रममा यहाँ कार्यरत चिकित्सकमा कोरोना संक्रमण पुष्टि भएको थियो ।
अस्पतालका सूचना अधिकारी राजकुमार घिमिरेका अनुसार फ्रन्टलाइनमा रहेर काम गर्ने ५० जना स्वास्थ्यकर्मीहरूको आज स्वाब संकलन गरिएको छ।
कन्ट्याक्ट ट्रेसिङका क्रममा प्राप्त हुने रिपोर्टका आधारमा सेवा सञ्चालन गरिने घिमिरेले बताए।
अस्पतालको ओपिडीमा भीड हुँदा संक्रमणको जोखिम बढ्ने देखेर सेवा बन्द गरिएको उनले बताए।
संक्रमण पुष्टि भएका चिकित्सकको अवस्था सामान्य छ। उनको श्रीमतीलाई पनि कोरोना पोजेटिभ देखिएको थियो। उनीहरू भरतपुर–७ स्थित निवासमा होम आइसोलेसनमा छन्।
त्यस्तै, एक जना कर्मचारीमा कोरोना पोजेटिभ देखिएपछि पर्यटकीय नगरी सौराहामा रहेका बैंक तथा वित्तीय संस्थाहरू बन्द गरिएका छन्।
प्रभु बैंक सौराहा शाखाका एक कर्मचारीमा बुधबार संक्रमण पुष्टि भएको थियो। ती कर्मचारीले नवलपरासीमा स्वाब दिएका थिए। उनी तीन दिनअघि सरूवा भएर सौराहा शाखामा आएका थिए।
सौराहामा झन्डै दुई दर्जन बैंक तथा वित्तीय संस्था छन्। कोरोना संक्रमण देखिएका ती कर्मचारीको कन्ट्याक्ट ट्रेसिङ गरी रिपोर्ट नआउन्जेल सम्मका लागि बैंक तथा वित्तीय संस्था बन्द गरिएको ईलाका प्रहरी कार्यालय टाँडीका प्रहरी नायब उपरीक्षक रबिन कार्कीले बताए।
चितवनमा बुधबार गरिएको परीक्षणमा एक चिकित्सक र ६ जना सशस्त्र प्रहरीमा कोरोना पोजेटिभ देखिएको थियो।
