बालाजुमा बन्द अवस्थामा रहेको जनमैत्री अस्पताललाई कोरोना विशेष अस्पताल बनाउन काठमाडौं महानगरपालिका वडा नम्बर १६ ले पहल थालेको छ।
बन्द रहेको अस्पताल पुन: सञ्चालनमा ल्याउन सके कोरोना जोखिममा रहेकालाई स्वास्थ्य उपचार दिन सजिलो हुने भएकोले पहल थालेको वडाध्यक्ष मुकुन्द रिजालले जानकारी दिए।
‘काठमाडौं उपत्यकाभित्र र १६ नम्बर वडामा पनि कोरोना संक्रमित संख्या वृद्धि भइरहेको छ। यस्तो अवस्थामा संक्रमितलाई स्वास्थ्य सेवा उपलब्ध गराउन कठिन छ। जनमैत्री अस्पताल पुन: सञ्चालन गरी यहाँबाट सेवा दिन सकियो भने संक्रमितलाई केहि सुविधा हुन्थ्यो,’ उनले भने।
अस्पताल सञ्चालन गरी कोरोना संक्रमणको सम्भावित जोखिम न्युनिकरण, नियन्त्रण र व्यवस्थापन गर्न सहयोग हुने भएकोले अस्पताल सञ्चालनमा सहयोग गरिदिन उनले आग्रह गरेका हुन्। यो अस्पताल जनमैत्री ट्रष्टको नाममा छ।
अस्पताल सञ्चालन गर्दा कुनै समस्या भए वडा र महानगरबाट सहयोग उपलब्ध गराउनेसमेत उनले बताएका छन्। वडाध्यक्ष रिजालले अस्पताल सञ्चालनमा सहयोग गरिदिन पत्राचार गरिसकेका छन्।
उक्त पत्रको बोदार्थ स्वास्थ्य तथा जनसंख्या मन्त्रालय, जिल्ला प्रशासन कार्यालयलगायतमा पठाएको उनले बताए।
कांग्रेस केन्द्रीय सदस्य नवीन्द्रराज जोशीले तीन सय शैयाको सुविधा सम्पन्न अस्पताल पुन: सञ्चालनमा ल्याएर कोरोना विशेष अस्पताल बनाउनुपर्ने बताए।
‘सरकारले राजधानीमै आइसोलेसन बेड अभावका कारण व्यवस्था गर्न सकेको छैन,’ उनले भने, ‘तर काठमाडौं महानगर १६ बालाजुमा तीन सय शैयाको सुविधासम्पन्न अस्पताल लामो समयदेखि बन्द छ।’
अस्पताल सञ्चालनमा वडाध्यक्ष रिजालले अग्रसरता लिएकोले सरकार, प्रदेश सरकार र मन्त्रालयहरूले तत्काल कदम उठाउनुपर्ने कांग्रेसका अर्का केन्द्रीय सदस्य प्रदीप पौडेलको भनाइ छ।
यो अस्पताल करिब १५ वर्ष पहिले खुलेको थियो। पछिल्लो सात वर्षदेखि अस्पताल बन्द छ। केहि समयअगाडि काठमाडौं महानगरले नै यो अस्पताल खरिद गर्न लागेको चर्चा थियो।
