सरकारले प्रत्येक प्रदेशका २ जिल्ला अस्पताललाई ४ भेन्टिलेटर र १० आइसियू बनाउन बजेट निकासा गरेको छ।
स्वास्थ्य मन्त्रलायका प्रमुख विशेषज्ञ रोशन पोखरेलले हरेक प्रदेशलाई २ करोडका दरले बजेट पठाइएको जानकारी दिए।
सरकारले सामानसँगै स्वास्थ्यकर्मीसमेत भर्ना सुरू गरेको छ। पोखरेलका अनुसार एमडी र एमएस पासआउट भएका २३ जना स्वास्थ्यकर्मीलाई सरकारले प्रदेश २ मा पठाएको छ।
‘२३ जनालाई २ नम्बर प्रदेशमा पठाएका छौं। नारायणी उपक्षेत्रीय अस्पताल, गौर अस्पताल र जनकपुरमा पठाउने निर्णय भएको छ’, पोखरेलले प्रतिनिधि सभाको शिक्षा तथा स्वास्थ्य समितिको भर्चुअल मिटिङमा भने, ‘११ जना नारायणी अस्पताल गैसकेका छन्।'
पोखरेलले एक साताभित्रै काठमाडौं उपत्यकामा कन्ट्याक्ट ट्रेसिङमार्फत् ४० देखि ५० हजार परीक्षणको तयारी सरकारले गरिरहेको बताए। उनले त्यसका लागि उपत्यका भित्रका सबै महानगरपालिका र नगरपालिकाहरुलाई कन्ट्याक्ट ट्रेसिङ अगाडि बढाउन आग्रह गरिएको बताए।
देशभर १ हजार ७५ टिम ट्रेसिङमा खटिएको उनले बताए।
उनले काठमाडौं उपत्यकाका अस्पतालमा ६ हजार आइसोलेसन बेड बनाउने तयारी सरकारले गरिरहेको बताए। साथै विभिन्न संघ र संस्थामा ३५ सय बेड तयार पारिरहेको उनले जानकारी दिए। त्यस्ता संघ, संस्थामा आइसोलेसनमा बस्नेलाई कुनै समस्या भए अस्पताल लैजाने उनले बताए।
काठमाडौं उपत्यकाका अस्पतालहरूले अब कोभिडको उपचार गर्नैपर्ने उनको भनाइ छ।
‘जुन अस्पतालसँग प्रवेश गर्ने छुट्टै ढोका छ, भवन फरक छ, त्यसले अब कोभिडको उपचार गर्नुपर्छ’, पोखरेलले भने, ‘भेन्टिलेटर र आइसियूमा बिरामी राख्ने विषयमा भने सरकारले कोअर्डिनेट गर्छ।'
