बिपी कोइराला स्वास्थ्य विज्ञान प्रतिष्ठानमा उपचाररत् एक जना कोरोना संक्रमितको मृत्यु भएको छ।
प्रतिष्ठानका प्रवक्ता डा. निदेश सापकोटाका अनुसार आइतबार विराटनगर-१२ का ७० वर्षीय वृद्धको मृत्यु भएको हो। उनको दिउँसो २:१८ बजे मृत्यु भएको सापकोटाले बताए।
उनी ज्वरो, खोकी र स्वासप्रश्वासमा समस्या भएपछि सुरूमा विराटनगरको म्याक्स अस्पताल भर्ना भएका थिए।
भदौ १६ गते भर्ना भएका उनको प्रादेशिक ल्याबमा परीक्षण गर्दा कोरोना संक्रमण पुष्टि भएको थियो।
संक्रमण पुष्टि भएपछि स्वास्थ्य अवस्था गम्भीर भएपछि उनलाई भदौ १७ गते बिपीमा रिफर गरिएको थियो। उनमा उच्च रक्तचाप थियो।
उनको शव नियमानुसार व्यवस्थापन भइरहेको सापकोटाले जनाएका छन्।
