सिन्धुपाल्चोकको बाह्रबिसे नगरपालिका ७मा आइतबार बिहान गएको पहिरोमा पुरिएका ११ जनाको शव फेला परेको छ।
जिल्ला प्रहरी कार्यालयका प्रहरी नायब उपरीक्षक (डिएसपी) प्रकाश सापकोटका अनुसार साँझसम्म ११ जनाको शव फेला परेको हो। बिहान वडा नम्बर ७ को भिरखर्क, नागपुजे, केम्बे भन्ने स्थानमा पहिरो गएको थियो।
मृत्यु हुनेमा ६२ वर्षीया भक्तिमाया श्रेष्ठ, ६० वर्षीया सर्किनी नेवार, २३ वर्षीया जुनु बिक, २४ वर्षीय सुकलाल बिक र ८ वर्षीय सन्देश बिक छन्। त्यस्तै ६५ वर्षीय धनलाल नेवार, ६० वर्षीय हिरामाया नेवार, ९८ वर्षीय ट्यासी शेर्पा, ४२ वर्षीया ज्ञानीमाया प्रधान, ५ वर्षीया सरस्वती विक र २५ वर्षीय करण बहादुर श्रेष्ठ छन्।
पहिरोमा पुरिएका २० जना अझै बेपत्ता भएका छन्। भिरखर्कको विक टोलका तीन जना, नाकपुजेका १६ जना र नेवार टोलका एक जना बेपत्ता भएको डिएसपी सापकोटाले जानकारी दिए।
पहिरोबाट २२ घरमा क्षति पुगेको कार्यालयले जनाएको छ भने केम्बेका १७ घर जोखिममा छन्। डिएसपी सापकोटाका अनुसार राति भइसकेकाले अब सोमबार बिहान पुनः खोजी कार्य थालिने छ।
जोखममा रहेका परिवारहरूको उद्दार तथा राहत दिने कार्य भइरहेको उनले बताए।
यता उपमेयर सुशिला पाख्रिनले पनि जोखिममा रहेका परिवारको लागि टेन्टको व्यवस्था गरिएको बताइन्। ‘हामीले अहिले १५ वटा जति टेन्टहरू बनाएर राखेका छौं। उनीहरुको लागि पानी खानेकुरा, बत्तिको व्यवस्था मिलाउँदै छौं,’ उनले भनिन्।
