धनगढीमा वन्यजन्तु संरक्षणका लागि आरक्षण केन्द्र स्थापना गरिएको छ।
धनगढी उप–महानगरपालिका वडा नम्बर ४ मा रहेको शिवपुरी सामुदायिक वनमा सात लाखको लगानीमा घाइते तथा टुहुरा वन्यजन्तुका लागि आरक्षण केन्द्र स्थापना गरिएको हो।
डिभिजन वन कार्यालय धनगढी र धनगढी उप–महानगरपालिकाको झण्डै सात लाखको लागतमा जनावरको संरक्षणका लागि केन्द्र स्थापना गरिएको शिवपुरी सामुदायिक वन धनगढीका अध्यक्ष बुद्धि खड्काले बताए।
सुदूरपश्चिमकै नमूना चिडियाखानाको रूपमा संरक्षण केन्द्रलाई विकास गरिने उनले बताए।
वन्यजन्तु हेर्ने पर्यटकीयस्थल नभएकाले महेन्द्रनगर, बर्दिया लगायतका निकुन्ज पुग्ने गरेका पर्यटकलाई लक्षित गरी धनगढीमै चिडियाखाना बनाउन थालिएको सामुदायिक वनको दाबी छ।
‘सुरूआतमा कैलालीकै जंगलबाट उद्धार गरिएका जनावरहरूलाई केन्द्रमा राख्छौं। तिनको पालनपोषण शिवपुरी सामुदायिक वनले गर्नेछ’ खड्काले भने।
यस्तै जनावरको रेखदेखका लागि दुई जना हेरालु राखिएको छ भने तिनीहरूको औषधि उपचार उप–महानगरपालिकाले गर्ने भएको छ।
उपमहानगरपालिकाका मेयर नृपबहादुर वडले संरक्षण केन्द्रको अवलोकन गर्न पर्यटक आउने अपेक्षा व्यक्त गरे।
अहिले संरक्षण केन्द्रमा एक चित्तल र एक रतुवा राखिएको छ भने प्रदेशकै नमुना मिनि (जु) का रूपमा विकास गरिने लक्ष्य राखिएको छ।
