गैरकानुनी बाटोबाट नेपालगञ्ज हुँदै भारततिर लैजान लागिएका ५४ जनालाई प्रहरीले नियन्त्रणमा लिएको छ।
उनीहरूलाई भारत लैजाने जिम्मा लिएका दुई जना युवालाई पनि प्रहरीले पक्राउ गरेको छ।
जिल्ला प्रहरी कार्यालय बाँकेका अनुसार पक्राउ पर्ने युवा नेपालगन्ज १३ का सरोज हैयम राई र तुलसीपुर ८ का अम्बर गन्दर्व छन्।
उनीहरूले रुकुम, दैलेख, बर्दिया, बाँकेलगायत जिल्लाबाट स्थानीयलाई भारत लैजान खोजेका थिए।
प्रहरी उपरीक्षक ओम रानाका अनुसार भारतमा काम लगाइदिने भन्दै उनीहरूलाई बाँके ल्याएर विभिन्न होटलमा राखेर सोमबार बिहान नाका कटाउन लागिएको थियो।
नाकानजिक डुडुवा गाउँपालिका १ को स्कुलमा राखेको अवस्थामा उनीहरूलाई उद्धार गरिएको रानाले बताए। उद्धार गरिएकामा ४९ पुरुष र ५ महिला छन्। त्यहाँको खडैजा नाकाबाट उनीहरूलाई भारत लैजान खोजिएको थियो।
भारतमा रोजगारी लगाइदिने बहानामा उनीहरूले प्रत्येक व्यक्तिबाट ८ हजार रुपैयाँसम्म लिएका थिए। भारतमा यो काम लगाइदिने जिम्मा अर्कै नेपाली युवाले लिएका थिए।
ती युवाको नाम प्रहरीले गोप्य राखेको छ। ‘सडक मजदुरको रुपमा काम दिने भनी उनीहरूलाई गैरकानुनी तरिकाले लगिएको बेला उद्धार गरिएको हो,’ रानाले भने।
पक्राउ परेका युवाले ती नेपालीलाई भारतको सिम्रामा लैजान लागेको र त्यहाँ काम लगाइदिने जिम्मा अर्कैले लिएको बयान प्रहरीमा दिएका छन्। उनीहरूलाई मानव बेचबिखन तथा ओसारपसार मुद्दामा अनुसन्धान थालिएको छ।
उद्धार गरिएकाहरूलाई परामर्श दिने काम भइरहेको रानाले बताए। उनीहरूलाई परामर्शपछि घर फर्काइने छ।
कोरोना भाइरसको महामारीका कारण अहिले कामविहीन भएकाहरू लुकिछिपी भारत जानेहरूको संख्या उल्लेख्य छ। कतिपय पहिले नै भारतमा काम गरिरहेका तर लकडाउनका कारण फर्किएकाहरू पनि उतै जान लालायित छन्।
