नेपाल प्रहरीले आफ्ना कर्मचारीहरूले पालना गर्नुपर्ने आचार संहितासम्बन्धी कार्यादेश, २०७७ जारी गरेको छ।
मंगलबार सार्वजनिक गरेको कार्यादेशमा कर्मचारीहरूले विपरित लिङ्गीलाई मुसार्ने, टाँसिने, छुने, चिमोट्ने धाप मार्नेजस्ता कार्य गर्न नहुने उल्लेख गरिएको छ।
त्यस्तै कर्मचारीले अनुमति बिना विदेशी नियोग, विदेशी कुटनैतिक व्यक्ति र राष्ट्रिय तथा अन्तराष्ट्रिय गैर सरकारी संस्थासँग भेटघाट, सम्पर्क तथा सहकार्य गर्न नहुने उल्लेख गरिएको छ।
आफ्नो पदीय जिम्मेवारी र दायित्वसँग असम्बन्धित कार्यक्रममा सहभागी हुन, सम्बोधन गर्न मन्तव्य दिन, टिकाटिप्पणी समेत गर्न नपाइने केन्द्रीय प्रहरी कार्यालयले जनाएको छ। स्वार्थपूर्ति गर्न सञ्चारमाध्यमको प्रयोग गर्न र सूचना चुहावट समेत गर्न नपाइने कार्यादेशमा उल्लेख छ।
सामाजिक सञ्जालमा राष्ट्रिय अखण्डतामा खलल पार्ने, साम्प्रदायिक दङ्गा भड्काउने, आतङ्ककारी गतिविधिलाई प्रश्रय दिने, अपराध अनुसन्धानलाई प्रभावित पार्ने विषयमा लाइक, कमेन्ट, सेयर, ट्याग जस्ता सांकेतिक प्रतिक्रिया जनाउन नपाइने प्रहरीले जनाएको छ।
जारी गरिएको कार्यादेश पालना गराउने सम्बन्धमा प्रहरी प्रधान कार्यालय, महानगरीय कार्यालय, परिसर, प्रदेश, जिल्ला लगायत कार्यालयका छुट्टाछुट्टै समितिले अनुगमन गर्ने केन्द्रीय कार्यालयले जनाएको छ।
