बीपी कोइराला स्वास्थ्य विज्ञान प्रतिष्ठान धरानमा उपचारको क्रममा दुई जना कोरोना संक्रमितको मृत्यु भएको छ।
मृत्यु हुनेमा झापाको मेचीनगरकी एक महिला र सुनसरीको इनरुवा नगरपालिकाकी एक महिला रहेको प्रतिष्ठानका प्रवक्ता डा.निदेश सापकोटाले बताए।
उनका अनुसार मेचीनगर ८ झापाकी ७२ वर्षीया वृद्धाको गएराति ९ बजेर २० मिनेटमा निधन भएको हो। उनलाई असोज ४ गते कोरोना संक्रमण पुष्टि भएको छ।
श्वासप्रश्वासमा कठिन, छाती दुख्ने, निमोनियालगायत भएपछि उनलाई कन्काई अस्पताल झापाले बीपीमा रिफर गरेको थियो। उनी असोज ४ गते बीपीको कोभिड अस्पतालमा भर्ना भएकी थिइन्।
यस्तै, इनरुवा ४ सुनसरीकी ४९ वर्षीया महिलाको पनि निधन भएको प्रतिष्ठानले जनाएको छ।
उनको सोमबार बिहान २ बजे निधन भएको हो।
उच्च रक्तचाप, मधुमेह र मिर्गौलाको समस्या भएपछि मेडिसिन वार्डमा भर्ना भएकी उनलाई कोडिभ पुष्टि भएपछि कोभिड अस्पतालमा भर्ना गरिएको थियो।
उनलाई असोज १ गते संक्रमण पुष्टि भएको थियो।
