बाराबाट १२ लाख ६ हजार नक्कली नोटसहित दुई जना पक्राउ परेका छन्।
प्रहरीले बुधबार बिहान बारागढी गाउँपालिका ५ सिघासनी बस्ने २३ वर्षीय बलिराम चौधरी र विहार मोतिहारी झरौखरका २७ वर्षीय सन्दिप कुमारलाई पक्राउ गरेको हो।
सिम्रौनगढ नगरपालिका ९ बसवरिया नहरमा चोरीका मोबाइलहरू खरिदबिक्री भएको भन्ने विशेष सूचनाको आधारमा प्रहरीको टोली खटिएको थियो।
प्रहरीले उनीहरू सवार बा ६४ प ९७०६ नम्बरको बाइकलाई रोकी जाँच गरेको थियो। सोही क्रममा खानतलासी गर्दा सन्दिप कुमारले बोकेको पहेलो रंगको झोलाभित्र नक्कली नोट फेला परेको हो।
प्रहरीले एक हजार दरको १२ लाख १६ हजार रूपैयाँ बराबरको नक्कली रूपैयाँ फेला पारेको हो।
सो नोटबारेमा उनीहरूले प्रहरीलाई मोबाइल बिक्री गर्दा प्राप्त भएको बताएका छन्। साथै मोबाइल खरिद गर्नेले नक्कली नोटहरू दिएर ३० थान मोबाइल लिई फरार भएको प्रारम्भिक अनुसन्धानबाट खुल्न आएको प्रहरीले जनाएकाे छ।
प्रहरीले यस सम्बन्धमा थप अनुसन्धान गरिरहेको छ। मोबाइल लिई भागेका मानिसहरूको खोजी भइरहेको बारा प्रहरी कार्यालयले जनाएको छ।