भारतबाट फर्कंदै गर्दा बाटोमै मृत्यु भएका एक जना पुरुषमा कोरोना पुष्टि भएको छ।
बैंग्लोरबाट फर्किएका बैतडीको पुर्चौंडी नगरपालिका–३ का अन्दाजी ३५ वर्षीय पुरुषको शुक्रबार वडा नम्बर १ को बाटोमै मृत्यु भएको थियो।
बैलोरबाट चार दिन अगाडि आएका उनी घर पुग्नु दुई घण्टा अगाडि बाटोमै मृत भेटिएको प्रहरीले जनाएको छ। ‘उहाँले कसैलाई भेट्न पाउनु भएन। गौरीफन्टा हुँदै आएको बुझिएको छ,’ बैतडीका प्रहरी नायब उपरीक्षक नारायण अधिकारीले भने।
उनको शुक्रबार मृत्यु भएकोमा प्रहरीले घटनास्थल सुरक्षित राखी स्वाब परीक्षणका लागि डडेल्धुरा अस्पताल पठाएको थियो।
शनिबार उनको कोरोना रिपोर्ट पोजेटिभ आएको हो। ‘कोरोना संक्रमण देखिएकाले सेनाले शव व्यवस्थापन गर्दैछ,’ अधिकारीले भने।