३४ वर्षअघि हत्या गरी फरार भएका एक व्यक्ति पक्राउ परेका छन्।
प्रहरीले लिशंखुपाखर गाउँपालिका-७ बस्ने ५७ वर्षीय फुर्पा तामाङलाई आइतबार सवा २ बजे पक्राउ गरेको हो। उनलाई जिल्ला प्रहरी कार्यालय सिन्धुपालचोक र प्रहरी चौकी लामो साँघुबाट खटिएको टोलीले पक्राउ गरेको हो।
तामाङ र उनका दाइले २०४३ साल असोज २० गते सोही ठाउँ बस्ने २४ वर्षीय जोगलाल तामाङको हत्या गरेकाे प्रहरीले जनाएकाे छ।
प्रहरीका अनुसार घरबाट दशैंका लागि सामान किन्न डाँडापाखर बजार गएका जोगलाललाई उनीहरूले बाटो ढुकेर लाठी तथा खुकुरी प्रहार गरेका थिए।
सिन्धुपालचोकका प्रवक्ता प्रहरी नायब उपरीक्षक (डिएसपी) प्रकाश सापकोटाका अनुसार उनका दाइ पक्राउ परिसकेका थिए।
'दाजुभाइ मिलेर हत्या गरेका थिए। किन गरेको भन्ने अहिले आइसकेको छैन,' डिएसपी सापकोटाले भने, 'भाइ पहिलेदेखि नै फरार थिए, आज पक्राउ परे।'
अहिले उनी गाउँ आएकाे थाहा पाएपछि प्रहरीले उनलाई पक्राउ गरेको हो। कार्यालयका अनुसार उनलाई सिन्धुपाल्चोक जिल्ला अदालतमा बुझाउन प्रकृया अघि बढाइएको छ।
