जापान एयरलाइन्सले अर्को महिनादेखि यात्रुलाई सम्बोधन गर्दा 'लेडिज एन्ड जेन्टल मेन' नभन्ने भएको छ।
अक्टोबर १ देखि एयरलाइन्सले आफ्ना यात्रुहरूलाई सम्बोधन गर्ने तरिका परिवर्तन गर्न लागेको हो।
लेडज एन्ड जेन्टल मेनको सट्टामा 'एटेन्सन अल प्यासेन्जर्स' भन्दै सम्बोधन गरिने स्थानीय समाचार अनलाइन माइनिचीलाई उद्धृत गर्दै बिबिसीले समाचार लेखेको छ।
विश्वका एयरलाइन्समध्ये सबै लिंगलाई समान तरिकाले सम्बोधन गर्नेमा जापान एयरलाइन्स पनि एक हुनेछ। तर यो नियम अङ्ग्रेजी भाषामा गरिने सम्बोधनमा मात्रै लागू हुनेछ।
किनकी विमानमा जापानी भाषाबाट सम्बोधन गर्दा पहिले नै लैङ्गिक समानता भएको समाचार संस्था एएफपीले उल्लेख गरेको छ। गत वर्ष एयर क्यानडा र इजी जेटमा पनि लैङ्गिक समानतालाई मध्यनजर गर्दै सम्बोधन गर्ने भाषा परिवर्तन गरेको थियो।
जापान एयरलाइन्सले निकालेको एक विज्ञप्तिमा सकारात्मक वातावरण बनाउन र सबैलाई आदरपूर्वक व्यवहार गर्न यस्तो निर्णय गरेको उल्लेख छ।
