त्रिभुवन अन्तर्राष्ट्रिय विमानस्थलनमा नयाँ अराइभल कक्ष सञ्चालनमा आएको छ।
अन्तर्राष्ट्रिय टर्मिनल भवनभन्दा तल चक्रपथसँग जोडिएको नयाँ भवनमा उक्त कक्ष सञ्चालनमा आएको हो। टर्मिलनमा रहेको अध्यागमन र भन्सार पास भएर यात्रुहरु अबदेखि नयाँ पार्किङसम्म आउने छन्।
यसअघि टर्मिनल भवनसँगै आउने र जाने यात्रुको भीडभाड हुने गरेको थियो। टर्मिनलबाट अराइभल कक्षसम्म पुग्नका लागि अराइभल वाक-वे बनाइएको छ।
भन्सार पास भएपछि यात्रुहरु सिधै त्यही बाटोबाट पार्किङसँगै जोडिएको कक्षमा पुग्ने नेपाल नागरिक उड्डयन प्राधिकरणका महानिर्देशक राजन पोखरेलले जानकारी दिए।
नयाँ कक्षमा यात्रु कुर्न गएकाहरुलाई बस्ने व्यवस्थित ठाउँ, क्याफे, ट्राभल आउटलेटहरु हुने छन्। विमानस्थलका लागि यसअघि नयाँ पार्किङ बनाइएको थियो।
पार्किङ तल अराइभल कक्ष माथि हुँदा सास्ती हुँदै आएको थियो। नयाँ कक्ष ट्याक्सी पार्किङसँगै जोडिएकाले यात्रुका लागि सजिलो हुने पोखरेलले बताए।
