कोरोना भाइरसको महामारी चलिरहेको बेला भीडभाड, जमघट, भेला, पार्टी नगर्न भनिएको छ।
बेलायतको म्यानचेस्टर युनिभर्सिटीको एक क्याम्पसका विद्यार्थीले भने यही बेला एक पार्टीको आयोजना गरे। त्यस पार्टीमा कोरोनाबाट जोगिने कुनै सुरक्षाका उपायहरू अपनाइएको थिएन। किनकी पार्टीमा निम्त्याइएका सबै पाहुना 'कोभिड पोजेटिभ' थिए। फालोफिल्ड क्याम्पसका विद्यार्थीले शनिबार आयोजना गरेको उक्त पार्टीमा प्रवेश गर्न कोरोना भाइरसको संक्रमित हुनु आवश्यक थियो।
'केही दिनअघि त्यहाँ पार्टी भएको थियो, जहाँ प्रवेश गर्न कोरोना पोजेटिभ हुनुपर्ने नीति अपनाइएको थियो। त्यो स्वास्थ्य र सुरक्षित रहने उपायहरू जस्तै थियो,' १८ वर्षीय एक विद्यार्थीले मंगलबार द गार्डियनलाई भने। उनका अनुसार सुरक्षाकर्मी नआएको भए पार्टी ठूलो हुने थियो।
म्यानचेस्टरको पब्लिक हेल्थका निर्देशक डेभिड रेगनका अनुसार त्यस शहरमा १७-२१ वर्ष उमेर समूहका संक्रमित अरू शहरभन्दा ६ गुणा बढी छन्। एक लाखमध्ये झन्डै तीन हजार जना उक्त उमेर समूहका संक्रमित रहेको उनले बताए।
आइतबारसम्म म्यानचेस्टर युनिभर्सिटीका एक हजार ४१ जनामा संक्रमण पुष्टि भएको थियो।
नर्थउम्ब्रिया युनिभर्सिटीको ट्रिनिटी स्क्वायर क्याम्पसका एक विद्यार्थीले भने यस्तो पार्टी अझै हुने गरेको बताएका छन्।
'ग्रुप च्याटहरूमा अर्को पार्टी कहाँ हुन्छ भन्ने प्रश्न सोधिएका मेसेजहरू छन्,' १९ वर्षीय ती विद्यार्थीले भने।
उनले सेल्फ आइसोलेसनमा बसेका विद्यार्थीहरू धुमपान गर्न बाहिर जाने, ढोकाहरू छुने र लिफ्टहरूका बटनमा छुने गरेको भन्दै गुनासोसमेत गरेका थिए।
युनिभर्सिटी अफ म्यानचेस्टरका प्रवक्ताले घटनाबारे थाहा पाएको र अनुसन्धान भइरहेको बताएका छन्।
'हामीले यस जरूरी विषयमा अनुसन्धान गरिरहेका छौं र आन्तरिक अनुशासनको नीति प्रक्रियाअनुसार यसको सजाय विद्यार्थीले भोग्नुपर्नेछ। युनिभर्सिटीले ग्रेटर म्यानचेस्टर प्रहरी र म्यानचेस्टर सिटी काउन्सिलसँग यस घटनाको समीक्षा र त्यही अनुसार प्रतिक्रिया जनाउन दैनिक बैठक गरिरहेको छ।'
