बढ्दो कोरोना भाइरसको संक्रमणलाई ध्यानमा राख्दै फ्रान्सले देशका ९ शहरमा रात्रिकालिन कर्फ्यू लगाएको छ।
फ्रान्सका राष्ट्रपति इमानुएल म्याक्रोनले देशमा कोरोनाको बढ्दो संख्यालाई हेर्दै सोको रोकथामका लागि राजधानी पेरिससहित ९ शहरमा राति ९ बजेदेखि बिहान ६ बजेसम्म नागरिकहरू घरमै बस्नुपर्ने बताएका छन्।
एक टेलिभिजनलाई दिएको एक अन्तरवार्तामा राष्ट्रपति म्याक्रोनले शनिबारदेखि ९ शहरमा कर्फ्यू लगाउन लागेको र त्यो कम्तीमा चार सातासम्म हुने बताएका छन्।
फ्रान्सले देशमा स्वास्थ्य आपतकालसमेत लागु गरेको छ।
बुधबारमात्र फ्रान्समा २२ हजार ९ सय ५१ जना नयाँ संक्रमित फेला परेका छन्।
कोरोनाको दोश्रो लहरसँग जुध्न अहिले युरोपका कयौं सरकारले नयाँ प्रतिबन्धहरूको घोषणा गरेका छन्।
नेदरल्याण्डस्ले स्थानीय समय अनुसार रातको १० बजेदेखि आशिंक लकडाउन लागु गरेको छ।
यसअघि बुधबार स्पेनको उत्तरपूर्वि क्षेत्र क्याटोलिनाले बिहीबारदेखि बार र रेष्टुरेन्ट १५ दिनका लागि बन्द हुने घोषणा गरेको थियो।
यस्तै चेक रिपब्लिकले स्कूल र बार बन्द गरेको छ। पछिल्लो दुई सातादेखि युरोपमा धेरै संख्यामा कोरोना संक्रमित फेला परिरहेका छन्।
चेक रिपब्लिकको प्रति एक लाख जनसंख्यामा बितेको दुई सातादेखि करिब ५ सय ८२ जनामा संक्रमण पुष्टि भइरहेको छ।
युरोपभर संक्रमितहरूको संख्यामा वृद्धि हुँदै गइरहेको छ। रूसमा बुधबार १४ हजार ३ सय २१ नयाँ संक्रमित थपिएका छन् भने २ सय ३९ जनाले ज्यान गुमाएका छन्।
कोरोना रोकथामका लागि फ्रान्सले नयाँ कदमहरू उठाइरहेको छ।
राष्ट्रपति म्याक्रोन मार्च अप्रिलमा पहिलोपटक फैलिएको कोरोनाको तुलनामा अहिले फैलिरहेको कोरोनाको नयाँ एकदमै नयाँ भएको बताए।
म्याक्रोनले राजधानी पेरिससहित ९ शहरमा हाल ४ साताका लागि घोषणा गरिएको कर्फ्यूलाई सरकारले ६ सातासम्मका लागि लम्ब्याउन कोशिस गर्ने बताए।
कर्फ्यूपछि मानिसहरू राति अबेर रेष्टुरेन्ट तथा अन्य मानिसका निजी निवासमा जान पाउने छैनन्।
यो समयमा घरबाहिर निस्कन मानिसहरूसँग अत्यावश्यक कारण हुनुपर्नेछ। दैनिक जीवनमा महत्वपूर्ण हुने कुरामा भने कुनै पनि प्रकारको प्रतिबन्ध लगाइएको छैन्।
यस्तै स्कूलहरू खुला रहनेछन् भने दिनको समयमा मानिसहरूलाई एक शहरबाट अर्को शहरमा जान कुनै प्रतिबन्ध हुनेछैन।
म्याक्रोनले भने, 'हामीले कारवाही गर्नुपर्यो। भाइरसको फैलावटमा ब्रेक लगाउने आवश्यक्ता हामीलाई छ।'
उनले कर्फ्यूमा रहनु मानिसहरूका लागि कठिन भएको आफूले बुझेको बताए।