लुम्बिनी बौद्ध विश्वविद्यालयले बुटवलमा आंगिक क्याम्पस सञ्चालन गर्ने भएको छ। विश्वविद्यालयले लुम्बिनीमा केन्द्रीय क्याम्पस सञ्चालन गरी विभिन्न विषयमा विद्यार्थीहरूलाई पठन-पाठन गराइरहेको छ।
गत असोज २६ गते प्रधानमन्त्री निवास बालुवाटारमा सम्पन्न १२ औं विश्वविद्यालय सभाले बुटवलमा पहिलो आंगिक क्याम्पस खोल्ने निर्णय गरेको हो।
विश्वविद्यालयको पठन-पाठनप्रति विद्यार्थीहरूको आकर्षण बढ्दै जाँदा लुम्बिनीमा मात्रै खुम्चिएको क्याम्पसलाई बाहिर पनि आंगिक क्याम्पसको रुपमा सञ्चालन गर्न खोजिएको विश्वविद्यालयका रजिष्ट्रार डा. तिलक आचार्यले जानकारी दिए।
उनले सभाको निर्णयअनुसार बुटवलमा यसै शैक्षिक सत्रदेखि नै सिटी क्याम्पस सञ्चालनमा ल्याइने जानकारी दिए। सिटी क्याम्पसमा सुरू चरणमा मानविकीतर्फका विषयहरू सञ्चालन हुनेछन्। पछि बौद्ध दर्शनका विषय पनि थप्दै लगिने रजिष्ट्रार आचार्यले बताए। त्यस्तै, अहिले बुटवलमा स्नातक तहमा कानुन र ट्राभल एण्ड टुरिजम म्यानेजमेन्टका कक्षा समेत चलिरहेका छन्।
बुटवलमा आंगिक क्याम्पस खुलेसंगै विश्वविद्यालयका शैक्षिक कार्यक्रमहरू पनि विस्तार हुँदै जाने देखिएको छ।
आचार्यका अनुसार विश्वविद्यालयले लुम्बिनीमा बौद्ध दर्शन, कपिलवस्तुमा पुरातात्विक अनुसन्धान केन्द्र, देवदह र रामग्राममा अन्य शैक्षिक कार्यक्रम चलाउने रणनीति समेत बनाएको छ।
१५ वर्षअगाडि स्थापना भएको विश्वविद्यालयले पछिल्लो सात वर्षदेखि स्नातकोत्तर र स्नातक तहमा अध्यापन गर्दै आएको छ।
अहिले विश्वविद्यालयमा ७ सय २ जना विद्यार्थीले विभिन्न विषयमा अध्ययन गरिरहेका छन्।
त्यस्तै, विश्वविद्यालय सभाले विश्वविद्यालयबाट बौद्ध दर्शनबाहेक मानविकी विषयबाट पनि विद्यावारिधी गर्न सकिने निर्णय गरेको छ। यसअघि बौद्ध दर्शनमा मात्रै विद्यावारिधी गर्न सकिने व्यवस्था थियो।
विश्विद्यालयका कार्यक्रम थपिँदै जाँदा २ सय ५३ जनाको दरबन्दी पनि स्वीकृत गरेको आचार्यले जानकारी दिए। तीमध्ये शिक्षणतर्फ १ सय १२ र प्रशासनिक कर्मचारीतर्फ १ सय ४१ जनाको दरबन्दी स्वीकृत गरेको हो। चालु आर्थिक वर्षका लागि ३० करोड ६० लाखको बजेट पनि स्वीकृत गरेको छ।
त्यस्तै, विश्वविद्यालयले गायिका आनी छोइङ डोल्मालाई सद्भावना दूत बनाउने निर्णय गरेको छ। विश्वविद्यालयको अन्तर्राष्ट्रियस्तरमा प्रवर्द्धनका लागि डोल्मालाई दूत बनाइएको रजिष्ट्रार आचार्यले बताए।
लुम्बिनी बौद्ध विश्वविद्यालयले रुपन्देहीको देवदहमा रहेको एक सय बिगाहा जमिनमा केही समयभित्रै पूर्वाधार निर्माण गर्ने बताएको छ।