बडादशैंको अघिल्लो दिन हिन्दु मन्दिरका पुजारीको हत्या भएको छ ।
पश्चिम नवलपरासीको सुस्ता गाउँपालिका वडा नं ४ नर्सहीमा रहेको हनुमान मन्दीरका पुजारी सन्तश्री महँगु केवटको घाँटी रेटेर हत्या भएको हो।
सुस्ता गाउँपालिका वडा नं ४ का अध्यक्ष अशोक गुरुङका अनुसार दिउसो आइतबार करिब साढे २ बजेको समयमा उक्त घटना भएको हो।
हत्या गरिएका पुजारीको शरिरका विभिन्न स्थानमा धारिलो हतियार प्रहार भएको देखिएको र मृतकको सबैभन्दा बढी घाँटी र टाउकोमा प्रहार भएको जिल्ला प्रहरी कार्यालय नवलपरासीका प्रवक्ता प्रहरी नायव उपरीक्षक राजु लामाले बताए।
‘घटनाका सम्वन्धमा अनुसन्धान भइरहेको छ छिट्टै पत्ता लाग्ला, घटनाको प्रकृति हेर्दा उनलाई पछाडीबाट प्रहार गरे जस्तो देखिन्छ, शरिरका विभिन्न भागमा धारीले वस्तु प्रहार भएको छ घाँटी र टाउकोमा गम्भिर चोट छ’, लामाले भने।
स्थानीयका अनुसार मृतक पुजारी घरबाट करिब २ बजे आसपासमा साइकल लिएर निस्किएको र उनको पछिपछि साइकलमै एकजना अपरिचित भारतीय नागरिक गएका थिए।
वडा नं ४ का अध्यक्ष अशोक गुरुङले पुजारीको पछिपछि उनकै घरमा पानी खाएर भारत घर बताउने एक अपरिचित गएको स्थानीयले आफुलाई बताएको जानकारी दिए ।
यसैबिच विश्व हिन्दु परिषद् नेपालले हत्या गरिएका सन्तको हत्यारालाई कारबाहीको माग गर्दै प्रधानमन्त्रीलाई जिल्ला प्रशासन कार्यालय नवलपरासी मार्फत ज्ञापनपत्र बुझाएको छ।
परिषद्का नवलपरासी पश्चिम संयोजक राजेश गुप्ताद्धारा जारी विज्ञप्तिमा हत्यामा संलग्न अपराधीलाई यथाशीघ्र कानुनी दायरामा ल्याइ सार्वजनिक गरी कारवाही गर्न र मृतक सन्तलाई सहिद घोषणा गर्दै सन्तसमाजको सुरक्षा–व्यवस्था मिलाउन माग गरिएको छ।
