महानगरीय प्रहरी वृत्त थानकोटले ठूलो परिमाणमा लागुऔषधसहित एक जनालाई पक्राउ गरेको छ।
पक्राउ पर्नेमा बारा सिम्रनगढ नगरपालिका-२ का २४ वर्षीय आदित्य कुशवाह छन्। उनलाई नागढुंगाबाट खटिएको प्रहरीले बुधबार पक्राउ गरेको हो।
कुशवाह ना६ख १५३७ नम्बरको यात्रुबाहक बसमा यात्रुको रुपमा सवार थिए।
उनको साथबाट डाइजेपाम ४९६ एम्पुल, फेनारगन ४८६ एम्पुल र नुफिन ४१४ एम्पुल गरी जम्मा १ हजार ३९६ एम्पुल औषधीजन्य लागुऔषध बरामद भएको वृत्तका प्रहरी नायब उपरीक्षक (डिएसपी) घनश्याम श्रेष्ठले जानकारी दिए।
कुशवाहलाई पक्राउ वृत्तको हिरासतमा राखिएको छ। उनीउपर लागुऔषध (नियन्त्रण) ऐन २०३३ बमोजिम अनुसन्धान तथा कारबाही भइरहेको डिएसपी श्रेष्ठले बताए।