पछिल्लो २४ घन्टामा कोरोना संक्रमणका कारण विराटनगरमा ६ जनाको मृत्यु भएको छ। जिल्ला स्वास्थ्य कार्यालय मोरङका अनुसार शुक्रबार साँझ र शनिबार ६ जना संक्रमितको मृत्यु भएको हो।
नोबेल मेडिकल कलेज विराटनगरका अनुसार उपचाररत् चार संक्रमितको मृत्यु भएको छ। विराट मेडिकल कलेजमा एक जना र म्याक्स अस्पताल विराटनगरमा एक जनाको मृत्यु भएको जिल्ला स्वास्थ्य कार्यालयले जनाएको छ।
प्राप्त जानकारी अनुसार नोबेलमा उर्लाबारी-१ की ६६ वर्षीया महिला, सुनसरी इटहरीका ४२ वर्षीय पुरूष, झापा विर्तामोडका ७५ वर्षीय वृद्ध र सुन्दरहरैंचा नगरपालिका– १० की ६९ वर्षीय महिलाको मृत्यु भएको छ।
यस्तै, सुनसरी इटहरीका ४३ वर्षीय पुरुषको नोबेल मेडिकल कलेज पुग्नैलाग्दा एम्बुलेन्समै मृत्यु भएको छ। कोरोना पोजेटिभ देखिएपछि शुक्रबार साँझ अस्पताल आएका उनको भर्नाअघि नै मृत्यु भएको हो।
यसैगरी, विराट मेडिकल कलेजमा विराटनगर-३ का ६५ वर्षीय पुरूषको शनिबार बिहान मृत्यु भएको छ।
म्याक्स हस्पिटल विराटनगरमा शनिबार बिहान उदयपुरकी महिलाको मृत्यु भएको उक्त अस्पतालले जनाएको छ।
मृतकको शव व्यवस्थापनका लागि सम्बन्धित जिल्लास्थित नेपाली सेना र स्थानीय निकायलाई जिम्मा लगाइएको जिल्ला स्वास्थ्य कार्यालयले जनाएको छ।
