रुपन्देहीमा मोटरसाइकल दुर्घटनामा परी एक जनाको मृत्यु भएको छ।
देवदह नगरपालिका १० गणेशनगरमा सोमबार दुइटा मोटरसाइकल आपसमा ठक्कर खाँदा एक जनाको मृत्यु भएको हो। उक्त दुर्घटनामा परी दुई जना घाइते भएका छन्।
पूर्व पश्चिम राजमार्ग अन्तर्गत पश्चिमबाट पूर्वतर्फ जाँदै गरेको लु ४७ प ३२०२ नम्बरको मोटरसाइकल र पूर्वबाट पश्चिमतर्फ आउँदै गरेको लु ६५ प ५८६२ नम्बरको मोटरसाइकल आपसमा ठक्कर खाँदा उक्त दुर्घटना भएको थियो।
दिउँसो पौने १ बजेतिर भएको उक्त दुर्घटनामा परी पर्वत घर भई हाल नवलपरासीको प्रतापपुर १ बस्ने ५८ वर्षीय कमान सिंह थापाको उपचारको क्रममा मृत्यु भएको जिल्ला प्रहरी कार्यालय रुपन्देहीले जनाएको छ।
जिल्ला प्रहरी प्रवक्ता खड्क बहादुर खत्रीका अनुसार मृतक थापाले लु ६५ प ५८६२ नं. को मोटरसाइकल चलाएका थिए।
दुर्घटनामा परी गम्भीर घाइते भएका थापाको उपचारको क्रममा लुम्बिनी प्रादेशिक अस्पताल बुटवलमा मृत्यु भएको हो।
सोही दुर्घटनामा लु ४७ प ३२०२ नं. को मोटरसाइकलका चालक पाल्पाको बगनासकाली ४ का ३२ वर्षीय योगेन्द्र तिमिल्सेना र पछाडि बस्ने स्याङ्जाको कालीगण्डकी ५ का ४१ वर्षीय गुणाखर भुसाल घाइते छन्।
