उपचारका लागि विराटनगरतर्फ लैजाँदै गर्दा कोरोना संक्रमित एक महिलाको बाटोमै मृत्यु भएको छ। शिवसताक्षी नगरपालिका वडा नम्बर ८ झिलझिलेकी ३६ वर्षीया महिलाको मंगलबार दिउँसो सवा १ बजे मृत्यु भएको हो।
मेची प्रादेशिक अस्पतालमा सोमबार पिसिआर गरेकी महिलाको सोही दिन साँझ पोजेटिभ रिपोर्ट आएको थियो।
मेची प्रादेशिक अस्पतालमा उपचार सुरू गरेकी संक्रमित महिलाको स्वास्थ्य अवस्था कमजोर बनेपछि विराटनगर लैजाँदै गर्दा उनको मृत्यु भएको शिवसताक्षी नगरपालिकाको स्वास्थ्य शाखाले जनाएको छ।
उनको दमक बजार क्षेत्रमा मृत्यु भएको शिवसताक्षी नगरपालिकाको स्वास्थ्य शाखाका स्वास्थ्य सहायक सञ्जय ठकुरीले बताए।
नेपाली सेनाले शव व्यवस्थापन गर्ने शिवसताक्षी नगरले जनाएको छ। उनको परिवारको इच्छाअनुसार कनकाई नदीमा दाहासंस्कार गरिने गरिने शिवसताक्षी नगरले जनाएको छ।
यो सँगै शिवसताक्षीमा कोरोनाका कारण मृत्यु हुनेको संख्या ८ पुगेको छ।