चिकित्सा शिक्षा सुधार अभियन्ता वरिष्ठ चिकित्सक गोविन्द केसीले चिकित्सा शिक्षामा बढाउन खोजिएको शुल्क तुरुन्त फिर्ता लिन माग गरेका छन्।
केसीले शनिबार सेतोपाटीसँग कुरा गर्दै चिकित्सा शिक्षा आयोगको शुल्क निर्धारण समितिले गरेको सिफारिस चिकित्सा शिक्षा ऐन र आफूसँग भएको सम्झौताविपरीत रहेको बताए।
कोरोना महामारीले मुलुक ग्रस्त भएको बेलामा शनिबार नै चिकित्सा शिक्षा आयोगले यस शैक्षिक सत्र २०७७/७८ का लागि एमबिबिएस शुल्क आठ लाख रुपैयाँ बढाउन सिफारिस गरेको छ।
आयोगले शनिबार शैक्षिक सत्र २०७७/०७८ मा एमबिबिएस कार्यक्रमको लागि आठ लाख रुपैयाँ बढाउनुपर्ने प्रस्ताव पेश गरेको छ।
यो शुल्क विद्यार्थी र आम अभिभावकको विरूद्धमा रहेको भन्दै केसीले अविलम्ब घटाउन माग गरेका छन्।
आयोगको शुल्क निर्धारण कार्यदलले विभिन्न कारण देखाउँदै ४० लाख २३ हजार २ सय ५० रुपैयाँबाट वृद्धि गरी ४८ लाख रुपैयाँ सिफारिस गरेको थियो।
चिकित्सा शिक्षामा शुल्क क्रमश: घटाउँदै लगेर नि:शुल्क गर्नुपर्ने चिकित्सा शिक्षा ऐनको मर्म हो। केसीसँग सरकारले सत्याग्रहका बेला गरेको सहमति मुख्य बुँदा पनि यही हो।
‘कोरोनामा चिकित्सा क्षेत्र अस्तव्यस्त भएको बेलामा शुल्क वृद्धि गर्नु आफैंमा गलत हो,’ केसीले भने, ‘घटाउनुको सट्टा बढाउनुमा सरकारको खराब नियत देखिन्छ, यस्तो कुरा हामीलाई मान्य हुँदैन।’
केसीले हाल कायम एमबिबिएसको शुल्क नै भारी भएको भन्दै यसलाई घटाउनुको सट्टा बढाएकोमा आपत्ति जनाए।
समितिले १७ विषयमध्ये अधिकांशमा बढाउने सिफारिस गरेको छ।
समितिले बिडिएस, एमडिएमएस, एमडिएस साइन्स, एमडी आयुर्वेद, एमएन एमएस्सी नर्सिङ, एम फर्मा, एमएस्सी मेडिकल माइक्रोबायोलोजी, एमएस्सी बेसिक साइन्स, एमफिल क्लिनिकल साइकोलोजीमा शुल्क बढाउन सिफारिस गरेको छ।
त्यस्तै, बिडिएसमा करिब एक लाख रुपैयाँ बढाउन सिफारिस गरेको छ।
यद्यपि, यो बढाउन सिफारिस गरिएको शुल्कमा सहमति भने कसैको छैन।
बैठकले यो विषयमा कुनै निर्णय गर्न नसके पनि तत्कालको अवस्था विश्लेषण गरी शुल्क निर्धारण गर्न शिक्षामन्त्री कृष्णगोपाल श्रेष्ठको अध्यक्षतामा सात सदस्यीय कार्यदल बनाउने निर्णय भएको स्रोतले जनायो।
विगतमा पनि शुल्क सिफारिसमा विवाद भएपछि कार्यदल बनाएर विद्यार्थी ठग्ने परम्परा भइरहेको भन्दै केसीले यस्तो भए आन्दोलन गर्ने चेतावनी पनि दिए।
‘बिनाआधार वर्षैपिच्छे किन एमबिबिएसमा शुल्क बढिरहेको छ? कुन माफियालाई पोस्न आयोगले यो काम गरिरहेको छ? चिकित्सा शिक्षा ऐन बनाएर आयोग माफियाको सेवामा लागेको छ, माफिया पोस्न आयोग नलागोस्,’ केसीले भने।
यो पनि हेर्नुहोस्