कास्कीमा आफ्नो बुवाको हत्या गरेको आरोपमा प्रहरीले एक जनालाई पक्राउ गरेको छ।
प्रहरीले पोखरा महानगरपालिका-३२ महकुना बस्ने ३४ वर्षीय रामकृष्ण कामीलाई पक्राउ गरेको हो। उनलाई प्रहरीले आइतबार नियन्त्रणमा लिएको जिल्ला प्रहरी कार्यालयका प्रहरी उपरीक्षक (एसपी) जीवनकुमार श्रेष्ठले जानकारी दिए।
उनले सोमबार बिहान १० बजे प्रहरीलाई अन्नुपुर्ण गाउँपालिका-३ पाउँदुरकोट घर भइ पोखरा बस्दै आएका आफ्ना ५८ वर्षीय बुवा जुमबहादुर कामीको भर्याङबाट लडेर मृत्यु भएको भन्ने जानकारी गराएका थिए।
इलाका प्रहरी कार्यालय शिसुवा मुकाम डाँडाकोनाकबाट घटनास्थल पुगेको प्रहरीको टोलीले घटना शंकास्पद पाएपछि सोधपुछ गरेको थियो।
सोधपुछ गर्दा भने रामकृष्णले बुवाको हत्या गरेको स्वीकारेको एसपी श्रेष्ठले बताए।
उनका अनुसार जुमबहादुर कामीको आइतबार राति नै हत्या भएको थियो। राति बुवा र छोराबीच विवाद भएको थियो।
सोही विवादको क्रममा बुवामाथि छोराले काठको आग्लोले हिर्काउँदा मृत्यु भएको एसपी श्रेष्ठले बताए।
'छोरा खाडीतिर बस्ने रहेछ। नेपाल फर्किएको दुई हप्ता भएको रहेछ,' उनले भने,'नेपाल फर्केर पनि तैंले मलाई भेट्न नआउने भनेर बुवाले भनेपछि विवाद सुरू भएको हो।'
रामकृष्ण कामी करिब १४/१५ वर्षदेखि विदेशमा बस्दै आएका थिए। उनी हरेक वर्ष नेपाल आउने-जाने गर्थे।
यसपाली नेपाल आएको दुई हप्ता हुँदा पनि बुवालाई नभेटेको भन्दै विवाद भएपछि छोरा रामकृष्णले उनको हत्या गरेको एसपी श्रेष्ठले बताए।
प्रहरीले घटनास्थलबाट रगत लागेको काठको चारपाटे आग्लो बरामद गरेको छ। रामकृष्णमाथि प्रहरीले कर्तव्य ज्यान मुद्दामा अनुसन्धान गर्न जिल्ला अदालतबाट १० दिन हिरासतमा राखेर अनुसन्धान गर्न अनुमति पाएको छ।
प्रहरीले यस घटनामा थप अनुसन्धान गरिरहेको छ।