प्रदेश १ का मुख्यमन्त्री शेरधन राईले ताप्लेजुङ दोभान बजारका आगलागी पीडितलाई आर्थिक सहयोग गर्ने बताएका छन्।
बिहीबार ताप्लेजुङ मेरिङ्देन ३ स्थित दोभान बजार पुगेका मुख्यमन्त्री राईले घर गुमाउनेलाई ५० हजार र डेरामा रहेकालाई ३० हजार रुपैयाँ उपलब्ध गराउने बताएका हुन्।
आगलागी पीडित परिवारलाई प्रदेश सरकारले प्रतिपरिवार ५० हजार नगद उपलब्ध गराउने र डेरा भाडामा बस्दै आएका परिवारलाई प्रतिपरिवार ३० हजार नगद उपलब्ध गराउने मुख्यमन्त्री राईले घोषणा गरेको उनका प्रेस सल्लाहकार ध्रुव सुवेदीले जानकारी दिए।
घटनास्थल पुगेका मुख्यमन्त्री राईले पीडितहरूको माग अनुसार ग्यास सिलिन्डर, चुलो र प्रेसर कुकर समेत उपलब्ध गराउने वचन दिएका छन्।
प्रदेश सरकारका तर्फबाट पीडित परिवारलाई तत्कालका लागि १८ सय केजी चामल, २५० केजी दाल, नुन, तेल लगायतका खाद्यान्न र म्याट्रेस लगायतका सामग्री मुख्यमन्त्री राईले हस्तान्तरण गरेका थिए ।