अनाथालयका सञ्चालकले बालिकालाई बलात्कार गरेको उजुरी परेपछि तुलसीपुर उपमहानगरपालिका वडा नं. १८ बिजौरीस्थित ‘असहाय बाल विकास नेपाल’ अनाथालयमा रहेका सबै बालबालिकालाई उद्धार गरिएको छ।
इलाका प्रहरी कार्यालय प्रमुख, तुलसीपुर उपमहानगरपालिका न्यायिक समितिको जानुका शर्मा, वडा १८ का अध्यक्ष माधव वली, तुलसीपुर उपमहानगरपालिका महिला, बालबालिकातर्फबाट माया श्रेष्ठको टोली आएर उद्दार गरेको हो।
सातदेखि १४ वर्ष उमेर समूहका १६ बालबालिकालाई टोलीले उद्दार गरेको हो।
बालिकाहरूलाई तुलसीपुुर उपमहानगरपालिकाले सञ्चालन गरेको सेफ हाउस (बोलेरी महिला सुरक्षा आवास गृह) मा लगेर राख्ने र ९ जना बालकहरूलाई तुलसीपुरस्थित एक विद्यालयको होस्टेलमा लगेर राखिनेछ।
पीडित बालिकाको भने राप्ती स्वास्थ्य विज्ञान प्रतिष्ठानमा उपचार तथा मनोपरामर्श जारी रहेको बताइएको छ।
ती बालिकाले सोही संस्थाका सञ्चालक विष्णु चौधरीले आफूमाथि गत कात्तिकदेखि पटक/पटक जबरजस्ती बालात्कार गरेको भन्दै जिल्ला प्रहरी कार्यालयमा उजुरी दिएकी थिइन्। अभियुक्त चौधरी भने फरार रहेको र उनको खोजी जारी रहेको प्रहरीले बताएको छ।
चौधरीलाई यसअघि पनि जिल्लाकै गढवा गाउँपालिकाकी एक बालिकामाथि भएको सामूहिक बलात्कार काण्डमा दोषी ठहर गर्दै अदालतले झन्डै दश वर्ष कैद सजाय र ५० हजार जरिवाना तोकेको थियो।
२०६५ साल चैत १५ गते बिजौरीमा भएको सामूहिक बलात्कार काण्डपछि उपचारका क्रममा उनको मृत्यु भएको थियो।
सम्बन्धित समाचार:
आफूलाई बलात्कार गरेको भन्दै अनाथालय सञ्चालकविरूद्ध अनाथालयकै १४ वर्षीया बालिकाले दिइन् उजुरी
विजौरी सामूहिक बलात्कार काण्ड : १० वर्षपछि मुख्य दोषी पक्राउ,यसरी भएको थियो घटना