झापाको विर्तामोड-१ स्थित स्वर्गीय टुंङगबहादुर बस्नेतको नाममा रहेको जग्गा अधिकृत वारेसनामा नै किर्ते बनाएर जग्गा विक्री गर्ने गिरोहका १० जनालाई झापा प्रहरीले पक्राउ गरी सार्वजनिक गरेको छ।
सोही कार्यमा संलग्न अन्य ६ जना फरार रहेको जिल्ला प्रहरी कार्यालय झापाले जनाएको छ।
जग्गासम्बन्धी अवैध कारोबार गर्ने सो समूहले बस्नेतको नाममा रहेको कित्ता नं. ४१८३ को १ कठ्ठा १३.७५ धुर जग्गा हडपेका थिए।
उक्त जग्गा पूर्वपश्चिम राजमार्गसँग जोडिएको विर्तामोड नगरपालिका वडा नम्बर १ को अतिथि सदन जाने सडक समेतले छोएको छ।
झापा प्रहरीका अनुसार सो जग्गा विक्रीसम्बन्धी किर्ते कागजात बनाएर विक्री गर्ने मुख्य नाइके गौरीगञ्ज–१ कुन्जिबारीका बलराम विश्वकर्मा (सुशील) हुन्।
उनी केही वर्षदेखि विर्तामोडमा बसेर निर्वहन लगायतका अन्य कारोबारमा दुई नम्बरी धन्दा चलाउँदै आएका थिए।
यसअघि उनलाई प्रहरीले नक्कली राजश्वको स्टिकरसहित पक्राउ गरेको जिल्ला प्रहरी कार्यालय झापाले जनाएको छ।
प्रहरीका अनुसार उनलाई त्योबेला राजनीतिक संरक्षण गरेर छुटाइएको थियो। प्रहरीले उपलब्ध गराएको विवरणमा सुशील नै मुख्य नाइके हुन्।
उनीसहित प्रहरीले बाह्रदशी–३ घर भई विर्तामोड–२ बस्दै आएका ३९ वर्षीय मंगलसिंह राजवंशी, नापीका पूर्व कर्मचारी एवं नमस्ते होटल चन्द्रगढीका सञ्चालक भद्रपुर –७ का ५२ वर्षीय नविन कोइराला, जग्गा कारोबारी बाह्रदशी–५ का ५० वर्षीय लिलाधर राजवंशी, विद्युत प्राधिकरण फिक्कलका कर्मचारी शिवसताक्षी–८ का भुपदेव कटुवाल, विर्तामोडमा ट्याक्टर सोरूम सञ्चालन गर्ने अर्जुनधारा –५ का ५३ वर्षीय लेखनाथ खनाल, दोभान कन्स्ट्रक्सनका सञ्चालक विर्तामोड–४ का ४३ वर्षीय गोविन्द वान्तावा (मिलन ), विर्तामोड १० घर भई कोटिहोम बस्दै आएका ७१ वर्षीय देवी प्रसाद पाण्डे, विर्तामोड –४ की ३३ वर्षीया रञ्जु राई र उर्लाबारी– ४ का ४८ वर्षीय राजन विश्वकर्मा पक्राउ परेका छन्।
फरार हुनेमा गौराहद ७ का वडाध्यक्ष बलराम खरेल, मालपोत भद्रपुरका अधिकृत चेतन अधिकारी, मालपोतका तत्कालीन नासु हरी तिवारी, ओखलढुङ्गा चिशंखुगडी –७ का बेग प्रसाद कोइराला, खोटाङ हलेसी तुवाचुङग–११ का देव बहादुर विष्ट र भद्रपुर ७ का ५३ वर्षीय प्रकाश कार्की छन्।
उनीहरूविरूद्ध ठगी, सरकारी छाप दस्तखत किर्ते, अपराधिक लाभ तथा संगठित अपराध मुद्दामा झापा जिल्ला अदालतबाट म्याद थप गरी अनुसन्धान गरिरहेको झापाका प्रहरी प्रवक्ता राकेश थापाले सेतोपाटीलाई जानकारी दिए।
उक्त गिरोहले जग्गा हडप्न तीन वर्षदेखि प्रयास गरिरहेका थिए।
जिल्ला प्रहरी कार्यालय झापाका प्रवक्ता डिएसपी राकेश थापाका अनुसार गएको असोज २८ गते विर्तामोड नगरपालिका वडा नम्बर ४ बस्ने रन्जु राईको नाममा रजिष्ट्रेसन पास गराउन सफल भएका थिए।
प्रहरीले जग्गासम्बन्धी संगठित अपराध गर्ने समूहलाई विभिन्न ठाउँबाट अलग-अलग मितिमा पक्राउ गरेको हो।
उनीहरूलाई पक्राउ गर्न १ नम्बर प्रदेश प्रहरी कार्यालय विराटनगर, जिल्ला प्रहरी कार्यालय झापा, ईलाका प्रहरी कार्यालय विर्तामोड लगायतको टोली परिचालित भएको थियो।