थापाथलीस्थित परोपकार तथा प्रसूति गृहले कोरोना संक्रमितका लागि ५० एचडियू बेड भएको छुट्टै अस्पताल सञ्चालन गरेको छ।
अस्पतालकी निर्देशक संगीता मिश्राका अनुसार मंगलबारदेखि अस्पतालमा कोरोना वार्ड र एचडियु कक्ष सञ्चालन आएको हो।
प्रसूति गृहले तयार पारेको एचडियू बेडमा कोरोना लागेका गर्भवती महिला र अन्य महिलाले मात्र सुविधा पाउने मिश्राले सेतोपाटीलाई जानकारी दिइन्।
‘हामीले कोरोनाका बेला यसको उपचार नगरी बस्न सकेनौं। हामीकहाँ कतिपय कोरोना लागेकै गर्भवती महिलाहरू आउनुहुन्छ। उहाँहरूलाई उपचार नगरी वा सुत्केरी नगराइ पठाउने कुरा भएन,' निर्देशक मिश्राले भनिन्, ‘अरू महिला पनि कोरोनाले सिकिस्त भएपछि अस्पताल नपाएको भन्ने खबर पढ्दा दुःख लाग्यो त्यसैले उहाँहरूलाई सेवा दिन हामीले छुट्टै बेडको व्यवस्था गरेका हौं।’
प्रसूति गृहमा गर्भवती अवस्था वा सुत्केरी गराउन आएपछि सुरूमा कोरोना लागेको छ कि छैन भनेर जाँच गरिन्छ। ज्वरो, रूघालगायतका लक्षण देखिएका विरामीलाई पिसिआर परीक्षण गर्न पठाइन्छ। त्यतिन्जेल उनीहरूलाई राख्ने छुट्टै कोठा छन्। लक्षण नदेखिएका बिरामीलाई भने सिधै इमर्जेन्सीलगायतका नर्मल वार्डमा पठाइन्छ।
अब पिसीआर परीक्षणमा कोरोना देखिए अस्पतालकै कोभिड वार्डमा राखेर उपचार गरिन्छ। अस्पतालले कोरोनाका गर्भवती बिरामीलाई राख्न २० वार्ड छुट्याएको छ। यो वार्डमा सामान्य लक्षण देखिएका संक्रमितलाई राखिन्छ।
प्रसूति गृहले एचडियू बेड भने कुपण्डोलस्थित आफूमातहतको नर्सिङ कलेजमा स्थापना गरेको छ। ५० बेडको यो एचडियूमा २० बेड गर्भवती बिरामीका छुट्याइएको छ। बाँकी तीस बेडमा गर्भवती नभए पनि कोरोनाका सिकिस्त विरामीलाई भर्ना गरेर राख्ने निर्देशक मिश्राले बताइन्।
यी एचडियुमा सिकिस्त भएका बिरामीलाई सिधै भने भर्ना गरिने छैन। आफूसँग सुरूमै कोरोनाका विरामी भर्ना लिनका लागि पिसिआर मेसिन, प्राविधिक, फिजिसियन डाक्टर लगायतका सुविधा नभएकोले टेकु अस्पतालले जाँच गरेर पठाएका बिरामीलाई मात्र राख्ने व्यवस्था गरेको छ।
‘टेकु अस्पतालमा आइसियु वा भेन्टिलेटरबाट एचडियूमा सार्नुपर्ने बिरामीलाई हाम्रो एचडियुमा पठाइदिन भनेका छौं। टेकु अस्पतालले पनि हाम्रो प्रस्तावमा खुसी हुँदै सहमति जनाएको छ,' मिश्राले भनिन्।
प्रसूति गृहले कोरोना वार्ड र एचडियूका लागि १० जना नर्स र ४ जना डाक्टरलाई खटाएको छ।
सरकारले एचडियू स्थापना गर्न प्रसूति गृहलाई ५ करोड रूपैयाँ उपलब्ध गराएको थियो। उनीहरूलाई कोरोनाका बिरामी राख्ने एचडियू स्थापना गर्नैपर्ने बाध्यता भने थिएन।
'एचडियू स्थापना गर्नैपर्ने बाध्यता हामीलाई थिएन। हामीले यहाँ नियमित उपचार नै गरिरहेका छौं। कोरोना एचडियूका लागि आएको पैसा फ्रिज हुन्थ्यो,' निर्देशक मिश्राले भनिन्, 'तर यस्तो महामारीको बेला आफूले गर्न सक्ने उच्चतम काम गर्नुपर्छ भन्ने मलाई लाग्यो। टेकु अस्पताल पनि सरकारी अस्पताल भएकाले समन्वय गरेर काम गर्दा राम्रै हुन्छ जस्तो लाग्यो।'
'मैले सबैलाई बोलाएर हामी डक्टर नर्सको जिम्मेवारी नै संकटमा काम गर्ने हो। आफैंलाई कोरोना लाग्ने सम्भावना हुँदा हुँदै पनि काम गर्न तयार हुनुपर्छ भनेर मैले सम्झाएँ,' उनले भनिन्, 'चार डाक्टर र १० नर्सलाई कोरोना संक्रमितको उपचार गर्ने टिममा राखेको छु। उनीहरू पनि काम गर्न खुसी खुसी तयार भए।'
यो सबै गर्न उनलाई पोहोर साल प्रदेश १ को कोशी अस्पताल प्रमुख हुँदाको अनुभवले पनि सजिलो भयो।
कोरोना महामारी सुरू हुँदा सरकारले आकस्मिकबाहेक सबै सेवा बन्द गर्न अस्पताललाई निर्देशन दिएको थियो। उनले भने कोशीमा सबै सेवालाई निरन्तरता पनि दिने र कोरोनाको उपचारका लागि छुट्टै कोभिड अस्पताल स्थापना गर्ने काम गरेकी थिइन्।
‘त्यो बेलाको अनुभवले पनि कसरी व्यवस्थापन गर्ने भन्ने थाहा भयो। त्यही अनुभवले यसपालि यहाँ कोभिड उपचार सुरू गर्न बल दियो,' उनले भनिन्।
त्यस्तै, लकडाउनको बेला अस्पताल आउनजान गाह्रो भएका बेला स्वास्थ्यमा समस्या आए गर्भवती महिलाले प्रसूति अस्पतालमा फोन गर्न सक्ने छन्।
अस्पताललले टोलफ्री नम्बर १६६००१०००४६ नम्बरमा फोन गर्न भनेको छ। त्यस्तै मोबाइल नम्बर ९८६००१८०३४ र ९८६००१८०३५ मा पनि फोन गरेर आफ्नो समस्या सुनाउन सक्नेछन्।
जुनसुकै ठाउँबाट गर्भवती महिलाले फोन गर्न सक्ने र फोनमार्फत समस्या सुनेर आफूहरूले आवश्यक सल्लाह सुझाव दिने निर्देशक मिश्राले बताइन्।