गृह मन्त्रालयले प्रयोगमा नरहेका अक्सिजन सिलिन्डरहरू अस्पतालमा बुझाएर सहयोग गर्न अपिल गरेको छ।
शुक्रबार एक विज्ञप्ति जारी गर्दै मन्त्रालयले अक्सिजन सिलिन्डरहरू स्वतस्फुर्तरूपमा नजिकैको अस्पताल वा सुरक्षा निकायलाई उपलब्ध गराइ सहयोग गर्न अपिल गरेको हो।
यसले कोरोना भाइरसको महामारी नियन्त्रण गर्न सहयोग गर्ने भएकाले योगदान गर्न मन्त्रालयले भनेको छ।
नेपालमा कोरोना भाइरस संक्रमणको दोस्रो लहर फैलिएको छ। संक्रमित संख्यामा दिनदिनै रेकर्ड बनिरहँदा अस्पतालमा भर्ना हुनेको संख्या पनि उत्तिकै बढेको छ। अस्पताल भर्ना हुनेको संख्या बढेपछि अक्सिजनको माग बढेको हो।
त्यसैलाई मध्यनजरमा राख्दै खाली भएका वा आफूले स्टकमा राखेका सिलिन्डरहरू जम्मा गरी अस्पतालमा बुझाउन सरकारले अनुरोध गर्दै आएको छ।
त्यसअन्तर्गत उद्योग, वाणिज्य तथा आपूर्ति मन्त्रालय तथा स्वास्थ्य तथा जनसंख्या मन्त्रालयको समन्वयमा अक्सिजन अभाव हुन नदिन विभिन्न उद्योग, आयोजना तथा व्यक्तिका साथमा रहेका अक्सिजन सिलिन्डर जम्मा गर्ने काम भइरहेको छ।
विभिन्न जिल्लामा प्रहरी नै परिचालन गरी जम्मा गरी स्टकमा राखिएका अक्सिजन सिलिन्डरहरू संकलन गरी अस्पतालमा बुझाउन थालिएको हो।
गृह मन्त्रालयका अनुसार शुक्रबार मात्रै एक हजार ८१६ वटा सिलिन्डर संकलन भएका छन्।
