रुपन्देहीमा कोरोनाका सक्रिय संक्रमितको संख्या ७ हजार नाघेको छ। बुधवार ९ सय ७ जना कोरोना संक्रमित थपिएपछि जिल्लामा सक्रिय संक्रमितको संख्या ७ हजार २ पुगेको जिल्ला स्वास्थ्य कार्यालयले जनाएको छ।
स्वास्थ्य कार्यालय रुपन्देहीका भेक्टर कन्ट्रोल निरीक्षक केदारनाथ शाहले बुधबार अहिलेसम्मकै सबै भन्दाबढी ९ सय ७ जना संक्रमित थपिएको जानकारी दिए।
त्यस्तै, पछिल्लो २४ घण्टामा रुपन्देहीमा १६ जनाको मृत्यु भएको छ। बुधबार थपिएका मृतकसँगै जिल्लामा मृत्यु हुने संक्रमितको संख्या ३ सय ९ पुगेको छ।
रुपन्देहीमा २४ घण्टामा १ हजार २ सय ४ जनाको पिसिआर परिक्षण गर्दा ९ सय ७ जनामा संक्रमण पुष्टि भएको हो। बुधबार थपिएका संक्रमितमध्ये बुटवल उपमहानगरपालिकाका मात्रै ३ सय ९५ जना जना रहेका छन्।
यस्तै, तिलोत्तमा नगरपालिकामा १ सय ७४, सिद्धार्थनगर नगरपालिकामा १ सय २, देवदह नगरपालिकामा ८७, सैनामैनामा ५९ जना तथा रोहिणी गाउँपालिकामा २१ जना संक्रमित थपिएका छन्।
यसैगरी, ओमसतिया गाउँपालिकामा १४, कञ्चन र शुद्धोधनमा १३-१३ जना, मायादेवी र गैंडहवामा ९-९ जना, सियारीमा ५, कोटहीमाई ३, लुम्बिनी सांस्कृतिक २ तथा मर्चवारीमा १ जना संक्रमित थपिएको स्वास्थ्य कार्यालयको तथ्यांक छ।
रुपन्देहीमा पछिल्लो २४ घण्टामा कोरोना संक्रमण मुक्त हुनेको संख्या ४ सय ३५ रहेको छ। हालसम्म कुल २० हजार ३७ जनामा संक्रमण पुष्टि भएकोमा १२ हजार ७ सय २६ जना संक्रमण मुक्त भएको स्वास्थ्य कार्यालयले जनाएको छ।
यस्तै, रुपन्देहीमा मृत्यु हुनेमध्ये एक तिहाइ संक्रमित बुटवलका मात्रै रहेका छन्। बुधवारसम्म बुटवल उपमहानगरपालिकाका १ सय ३ जना संक्रमितको मृत्यु भएको शाहले जानकारी दिए।
त्यसैगरी, तिलोत्तमाका ५१, सिद्धार्थनगर नगरपालिकाका ५०, देवदहका २६, सैनामैनाका २३ जनाको मृत्यु भएको छ।
यस्तै, ओमसतिया, सुद्धोधन र मायादेवीमा ९-९ जनाको मृत्यु भएको छ। त्यस्तै, कञ्चनका ७, रोहिणीका ५, सियारी ४, कोटहीमाई, लुम्बिनी सांस्कृतिक र गैंडहवाका ३-३ जना र समरीमाइमा २ जनाको मृत्यु भएको शाहले जानकारी दिए।
