नारायणी नदीमा तियारी जाल प्रयोगगरी माछा मार्ने २४ जनालाई चितवन राष्ट्रिय निकुञ्जले नियन्त्रणमा लिएको छ।
निकुञ्जले प्रतिबन्ध लगाएको तियारी जाल प्रयोगगरी रातिको समयमा माछा मार्दै गरेका व्यक्तिहरूलाई नियन्त्रणमा लिइएको निकुञ्जले जनाएको छ।
चितवन निकुञ्ज सूचना अधिकारी लोकेन्द्र अधिकारीकाअनुसार भरतपुर महानगरपालिकाको वडा नम्बर २६ स्थित भगेडीबाट उनीहरूलाई राति ३ बजे नियन्त्रणमा लिइएको थियो।
उनीहरू ना ४ च ८७३९ नम्बरको बोलेरो जीप, ना ३३ प ८८१९ र बा ३–००–२ प ३४२४ नम्बरको स्कुटर चढेर माछा मार्न पुगेका थिए।
ती साधन माछा बोक्न प्रयोग गर्ने गरेका थिए।
निकुञ्ज र नेपाली सेनाको संयुक्त गस्ती टोलीले ती सवारी साधन र उनीहरूले मारेको दुई क्विन्टल माछा नियन्त्रणमा लिएको अधिकारीले बताए।
उनीहरूको साथबाट ४४ थान तियारी जाल पनि नियन्त्रणमा लिइएको निकुञ्जले जनाएको छ।
पक्राउ गरेकाहरूलाई राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम कानुनी कारबाही गरिने अधिकारीले बताए।
यहाँका राप्ती र नारायणी नदी दुर्लभ घडियाल गोहीको मुख्य बासस्थान हुन्।
माछा मार्न प्रयोग गरिएका तियारी जालमा फसेर नदीमा रहेका गोहीहरूसमेत मर्ने गरेका छन्।
निकुञ्जका प्रमुख संरक्षण अधिकृत अणनाथ बरालले तियारी जाल प्रयोग गर्नमा प्रतिबन्ध लगाएर आग्रह गरिए पनि यसको प्रयोग नघटेपछि कारबाहीमा अघि बढेको बताए।
निकुञ्जले राप्ती नदीमा माछा मार्नका लागि सीमित व्यक्तिलाई लाइसेन्स दिएको छ। तर लाइसेन्स प्राप्त गर्नेले पनि तियारी जाल भने प्रयोग गर्न पाउँदैनन्।
घडियाल गोहीको आहारा माछा हो। गोही संरक्षणका लागि माछा मार्ने कार्यमा नियन्त्रण गर्दै आएको निकुञ्ज बताउँछ।
