नगरक्षेत्र भित्रका खोलाहरुबाट नदीजन्य पदार्थ उत्खनन गर्न बन्द गरेको रुपन्देहीको तिलोत्तमा नगरपालिकाले अन्तबाट ल्याइने नदीजन्य वस्तु घाटगद्दी (संकलन) गर्न समेत रोक लगाएको छ।
नगरपालिका भित्रका खोलाहरुको उत्खनन् बन्द गर्नुको साथै अरु पालिका तथा जिल्लाबाट समेत नदीजन्य पदार्थ नगरक्षेत्र भित्र घाटगद्दी गर्न नपाउने गरी सूचना जारी गरिएको छ।
नदीजन्य पदार्थ अत्याधिक दोहन भइरहेको तथा चोरी निकासी बढेको समाचार सार्वजनिक भइरहदा नगरपालिकाको यस्तो निर्णय आएको हो।
नगरक्षेत्रमा रहेका खोला नालाहरुको उत्खनन गरी यसक्षेत्रका आयोजनाहरुमा समेत उपलब्ध गराउने कार्य ०७७÷०७८ का लागि बन्द गरिएको छ। साथै अन्तबाट ल्याइने सामग्रीका कारण उत्खनन् नियन्त्रणमा कठिनाई हुने भएकोले यस्तो निर्णय गर्नु परेको नगरपालिकाले जनाएको छ।
नगरपालिकाले चालु आर्थिक बर्ष २०७७÷७८ को लागि नदीजन्य पदार्थ उत्खनन गर्न अनुमति दिएका तिनाउ र सुखौरा खोलाबाट उत्खनन् गर्न बुधबारदेखि नै बन्द गरिएको सूचना जारी गरेको थियो।
आफ्नो अधिकार क्षेत्रभित्र पर्ने तिनाउ र सुखौरा खोलाबाट चालु आर्थिकबर्ष २०७७÷७८ मा विभिन्न आयोजनाहरुको लागि नदीजन्य पदार्थ उत्खनन् गर्न दिइएको अनुमति अनुसारको परिमाण पुरा भएकोले थप उत्खनन् गर्ने कार्य बन्द गरिएको नगरपालिकाले जनाएको छ।
नगरपालिकाले वडा नम्बर १२ को सेमरी, वडा नम्बर १ र ८ को सुखौरा, वडा नम्बर १४ को बाग्धुरा र वडा नम्बर ६ को पहुनी घाटबाट आयोजनाहरुको लागि नदीजन्य पदार्थ उत्खननको अनुमति दिएको थियो ।
नगरप्रमुख बासुदेव घिमिरेले नदीजन्य पदार्थ बोकेका साधनहरु नगरपालिका भित्रका नदी किनार, घाट तथा बाटो प्रयोग गरी आवतजावत गर्दा नगरपालिकाले नियन्त्रण गर्न नसकेको गुनासो आएकोले घाटगद्दी गर्न समेत निषेध गर्नु परेको बताए।
