लगातारको वर्षातका कारण मेलम्ची नदीमा आएको बाढीले आयोजनाको क्षेत्रमा बस्ने लेबरहरूको क्याम्पमा क्षति पुर्याएको छ। त्यहाँ हताहती भएको अनुमान गरिएको छ।
साँझ सात बजे मेलम्ची नदीमा बाढी आएको र त्यसले आयोजनामा केही क्षति गरेको आयोजनाका ईन्जिनियर राजेन्द्र पन्तले बताए।
उनका अनुसार लेबरहरू बस्ने क्याम्पमा क्षति पुगेको जानकारी आएको छ। तर, के कसो भन्नेबारे जानकारी आएको छैन।
‘बाढी पसेपछि बिजुली गएको छ, त्यहाँ सिसिटिभी जडान भएको थियो, बत्ती गएपछि के भएको हो पत्ता लगाउन सकिएको छैन,’ पन्तले भने।
सिन्धुपाल्चोक प्रहरी प्रमुख एसपी राजन अधिकाले मेलम्ची नदीमा बाढी आएकाले केही क्षति पुगेको बताए। तर, विवरण आइनसकेको जानकारी दिए।
‘वर्षाका कारण अकस्मात् बाढी आएर केही क्षति भएको हो भन्ने जानकारी आएको छ, राति भएको हुनाले हाम्रो टोली पुग्न सकेको छैन,’ उनले भने, ‘तर, नदीमाथि पहिले पहिरो खसेको र थुनिएको जानकारी छ, थुनिएको बहाव आएसँगै क्षति भएको बुझिएको छ।’
बाढी आएसँगै मेलम्चीमा रहेको सशस्त्र प्रहरीको क्याम्प विस्थापित भएको उनले बताए। सो क्षेत्रमा अहिले नेपाली सेना, नेपाल प्रहरी र सशस्त्र प्रहरी उद्धारमा जुटेको एसपी अधिकारीले बताए।