हिमालपारी मनाङमा बाढी र पहिरोमा फसेका ३५ जनाको हेलिकप्टरमार्फत् उद्धार गरिएको छ।
नेपाली सेनाको हेलिकप्टरमार्फत् मनाङको सिरानतालका २४ जना र थोंचेको गुम्बामा फसेका ११ जनाको हेलिकप्टरबाट उद्धार गरिएको प्रमुख जिल्ला अधिकारी विष्णु लामिछानेले बताए।
मौसममा आएको खराबीका कारण विगत ३ दिनदेखि मनाङ बाढी र पहिरोमा फसेका नागरिकलाई उद्धार गर्न हेलिकप्टर जान सकेको थिएन।
मौसममा सुधार आउनासाथ बिहीबार बिहानै सेनाको हेलिकप्टरले अलपत्र नागरिकको उद्धार गरिएको हो।
सिरानतालका नागरिकलाई हेलिकप्टरमार्फत् तालडाँडामा लगेर राखिएको छ भने थोंचे गुम्बाका नागरिकलाई सदरमुकाम चामे लगिएको छ।
बाढी र पहिरोले फसेका नागरिकको उद्धारमा मनाङबाट निर्वाचित सांसद पोल्देन गुरूङसमेत हेलिकप्टरमा गएका थिए।
सिडिओ लामिछानेका अनुसार सेनाको हेलिकप्टरले बाढी र पहिरोबाट पीडित भएका नागरिकलाई तत्काल राख्न त्रिपाल, टेन्ट लगायतका सामग्री समेत लगेको छ।
यस्तै, बाढी पहिरो पीडितको अवस्था अवलोकन गर्न गण्डकीका मुख्यमन्त्री कृष्णचन्द्र नेपाली पोखरेल पनि अहिले हेलिकप्टरमार्फत् मनाङतर्फ लागेका छन्।
यसअघि उनले प्रदेशस्तरीय विपद कोषमा ५ करोड रूपैयाँ राख्ने निर्णय गरेका थिए। उक्त रकम बाढी र पहिरो पीडितको राहत, उद्धार र व्यवस्थापनमा खर्च गर्ने जनाएको छ।