प्रदेश २ सरकारले जनकपुरधाममा कोभिड विशेष अस्पताल सञ्चालनमा ल्याएको छ।
जनकपुरधामको मुजेलियास्थित रहेको मणिपाल शिक्षण अस्पतालको जीर्ण भवनलाई मर्मत सम्भार गरेर प्रदेश सरकारले एक सय शय्याको कोभिड विशेष अस्पताल सञ्चालनमा ल्याएको हो।
मधेश स्वास्थ्य विज्ञान प्रतिष्ठान मातहत सञ्चालन हुने कोभिड विशेष अस्पतालको मुख्यमन्त्री लालबाबु राउत र सामाजिक विकास मन्त्री नवलकिशोर साहले संयुक्त रूपमा एक कार्यक्रमबीच उद्घाटन गरेका छन्।
गत वर्ष नै मणिपाल शिक्षण अस्पतालको सो जीर्ण भवनलाई कोभिड अस्पतालको रूपमा प्रयोग गर्ने प्रदेश सरकारले घोषणा गरे पनि सञ्चालनमा आउन सकेको थिएन।
अस्पतालको उद्घाटन गर्दै मधेश स्वास्थ्य विज्ञान प्रतिष्ठानका कुलपति समेत रहेका मुख्यमन्त्री लालबाबु राउतले मधेश स्वास्थ्य विज्ञान प्रतिष्ठानले कोभिड संक्रमितहरूको उपचारका अतिरिक्त अन्य विशेषज्ञ सेवाहरू समेत चाँडै प्रदान गर्ने जानकारी दिए।
शिक्षण अस्पताल सञ्चालनका लागि सरकारबाट जग्गा लिजमा लिएको मणिपालले दशकौपछि पनि अस्पताल सञ्चालन गर्न नसकेकाले लिज खारेज गराएर सो जग्गा प्रतिष्ठान मातहत ल्याउने पहल सुरू भएको मुख्यमन्त्री राउतले बताए।
उनले भने, ‘यस भवनमा कोरोना संक्रमितको उपचार मात्र होइन, अन्य विशेषज्ञ सेवा समेत चाँडै सुरू हुन्छ। जग्गा प्राप्तिको प्रक्रिया चाँडै सुरू गर्छौं, राज्यको अर्बौंको सम्पत्ति कुनै संस्थाले यसरी राख्न पाउँदैन।’
कार्यक्रममा समाजिक विकास मन्त्री नवलकिशोर साहले प्रदेश सरकारको गौरवको योजना रहेको मधेश स्वास्थ्य विज्ञान प्रतिष्ठान स्वास्थ्य उपचारको क्षेत्रमा मुलुककै नमूना बन्ने विश्वास व्यक्त गरे।
