मेलम्ची नदीमा आएको बाढीले मेलम्ची खानेपानी आयोजनासम्म पुग्ने चार वटा मोटरेबल पुल बगाएको छ।
मेलम्ची बजारदेखि हेडवर्क्ससम्म पुग्ने पुल बाढीले बगाएको आयोजनाका प्रवक्ता डिभिजनल इञ्जिनियर राजेन्द्र पन्तले बताए।
ती चारमध्ये एउटा अम्बाथानको पनि छ। त्यसले सुरूङमा पानी पठाउनका लागि मद्दत गर्थ्यो।
यी चार वटा पुल तुरुन्तै बनाउनु पर्ने देखिएको र आफूसँग त्यो क्षमता नरहेको आयोजनाको भनाइ छ।
‘हेडवर्क्ससम्म पुग्ने चार वटा पुल बगाएकाले मेलम्ची बजारबाट माथि जान सकिएको छैन,’ पन्तले भने।
ती चार वटा पुल स्थायी वा अस्थायी बनाउनेबारे नेपाली सेना र सडक विभागसँग आवश्यक समन्वय भइरहेको पन्तले बताए।
‘यस्ता पुल बनाउन ६-७ महिना लाग्छ, सेनाले चाँडै बनाउन सक्ने भएकाले समन्वय गरिरहेका छौं,’ पन्तले भने।
अहिले मेलम्ची खानेपानी आयोजनाको सुरूङ परीक्षणको क्रममा छ। सुरूङबाट पानी निकाल्ने काम भइरहेको छ।
अहिले सुन्दरीजल र सिन्धुबीचको पानी निकाल्ने काम भइरहेको छ। त्यसपछि ग्याल्थुङ र अम्बाथानको सुरूङ खाली गराइने पन्तले बताए।
‘सुरूङको पानी निकाल्न हामी आफैं सक्छौं, तर बेलिब्रिजहरू बनाउन भने सेनाको सहयोग चाहिन्छ,’ पन्तले भने।
यसबारे आयोजनाले सडक विभागसँग पनि कुराकानी भइरहेको जनाएको छ।
मेलम्चीमा बाढी आएकै दिन सुरूङ बन्द गरिएको थियो।
परीक्षण अवधि एक महिनाभन्दा लामो हुने छ। त्यसपछि मात्रै सुरूङमा पानी पठाउन मिल्छ।
‘फेरि बाढी आएर मेलम्चीमा थप क्षति हुन सक्छ भन्नेतर्फ पनि हेर्नुपर्ने भएको छ,’ पन्तले भने।
*शीर्षक सच्याइएको
