डडेल्धुरामा मृत फेला परेकी स्वास्थ्यचौकी कार्यालय सहयोगीको हत्या भएको प्रारम्भिक निष्कर्ष निकालिएको छ।
प्रहरीले गरेको प्रारम्भिक अनुसन्धानमा परशुराम नगरपालिका-८ की २६ वर्षीया अस्मिता धामीको हत्या भएको पाइएको सूदुरपश्चिम प्रदेश प्रहरी कार्यालयका प्रमुख प्रहरी नायब महानिरीक्षक (डिआइजी) उत्तमराज सुवेदीले जानकारी दिए।
कोरोनाविरूद्धको खोप पुर्याउन हिँडेकी जमरानी स्वास्थ्य चौकीमा कार्यरत धामी गत शनिबार मृत फेला परेकी थिइन्।
उनी गत बुधबारबाटै हराइरहेकी थिइन्। अघिल्लाे दिन मंगलबार खोप लगाएर बचेका १५ डोज भ्याक्सिन र केही कागजात बुधबार जोगबुडा अस्पताल पुर्याउनु पर्ने थियो। उनी ११ बजेतिर स्वास्थ्य चौकीबाट जोगबुडाका लागि हिँडेको इन्चार्ज रमेश बोहराको भनाइ छ। साेही दिन उनी स्थानीय हट्वानी सामुदायिक वनमा मृत फेला परेकी थिइन्।
'प्रारम्भिक रूपमा हेर्दा हत्या भएको देखिन्छ। थप अनुसन्धान गरिरहेका छौं,' डिआइजी सुवेदीले भने, 'देखिने खालका चोट छैन। तर अनुहार कीराले खाएको छ, त्यहाँ चोट छ कि भन्ने एउटा शंका छ। अनुसन्धान अघि बढाएका छौं।'
अस्मिता धामीको शव पोष्टमार्टमका लागि जोगबुडा अस्पतालमा राखिएको छ। शवको पोष्टमार्टम सकिए पनि रिपोर्ट आइसकेको छैन।
उनीमाथि बलात्कार भए/नभएको बारे पनि अनुसन्धान गर्न निर्देशन दिइएको छ। 'प्रारम्भिक अनुसन्धानमा बलात्कार भएको देखिन्न। तैपनि हामीले त्यो विषय स्पष्ट पार्न भनेका छाैं,' उनले भने।
शव फेला परेको ठाउँभन्दा पर उनको एक चप्पल, मास्क, बोकेका खोप फेला परेका थिए। अस्मिताका २ छोरी छन्। छोरीहरूलाई घरमै भएका मान्छेहरूसँग छोडेर उनी पनि कार्यालय गएकी थिइन्।
उनी हरेक दिन बिहान ९ बजे घरबाट करिब ४५ मिनेट हिँडेर कार्यालय पुग्थिन्। स्कुलेहरू, घाँसपात जानेहरू, एक गाउँबाट अर्को ठाउँ जानेहरू मुख्य सडकभन्दा छोटो हुने भनेर त्यहीं बाटो प्रयोग गर्ने गर्छन्।
अस्मिताले स्वास्थ्य चौकीमा सरसफाइ गर्ने, नियमित रूपमा खोप ल्याउने-पुर्याउने काम गर्थिन्।
अस्मिताले त्यहाँ काम गर्न थालेको करिब ३ वर्ष पुग्नै लागेको थियो। उनका श्रीमान भने ७ वर्षदेखि भारतको बेंगलुरुमा काम गर्दै आएका थिए। कोरोनापछि उनी गत वर्षको असारदेखि घरमै छन्।
सुदूरपश्चिम प्रदेश प्रहरी कार्यालयका प्रवक्ता प्रहरी उपरीक्षक योगेन्द्रसिंह थापाले घटनाको अनुसन्धानका लागि संघीय प्रहरी इकाई कार्यालय र सुदूरपश्चिम प्रदेश अनुसन्धान समूह (आरआइटी) को टोली पनि खटाइएको जानकारी दिए।
दुबै टोली आइतबार डडेल्धुरा पुगेका छन्। उनीहरूले अनुसन्धानको काम अघि बढाएका छन्।
प्रहरीले अहिलेसम्म कसैलाई पक्राउ गरिसकेको भने छैन।