बर्दियामा एक पुरूषको हत्या गरेको आरोपमा श्रीमती र छोरा पक्राउ परेका छन्।
सोमबार साँझ बर्दियाको मधुवन नगरपालिका वडा नम्बर ४ बादरधरियाका ३८ वर्षीय लक्षिराम थारूको हत्या भएको जिल्ला प्रहरी कार्यालयका प्रहरी नायब उपरीक्षक हेमबहादुर शाहीले जानकारी दिए।
हत्या आरोपमा प्रहरीले उनकी श्रीमती ३८ वर्षीया सीता थारू र १८ वर्षीय छाेरा आकाश थारूलाई पक्राउ गरेको छ।
मृतक लक्षिराम थारूले रक्सी खान भन्दै श्रीमती सीतासँग एक सय रुपैयाँ मागेको र सोही विषयमा उनीहरूबीच झगडा भएको प्रहरी नायब उपरीक्षक शाहीले बताए।
झगडापछि कुटपिट हुँदा लक्षिराम थारु घाइते भएका थिए। उनको उपचारको क्रममा मृत्यु भएको भन्ने खबरपछि ईलाका प्रहरी कार्यालय ढोढरीबाट टोली खटिएको थियो।
टोलीले मृतककी श्रीमती सीता र आकाशलाई नियन्त्रणमा लिएको हो।
उनीहरूलाई मंगलबार जिल्ला अदालत बर्दियामा उपस्थित गराइको प्रहरीले जनाएको छ।
अदालतले उनीहरूमाथि कर्तव्य ज्यान मुद्दामा थप अनुसन्धान गर्न पाँच दिन हिरासतमा राख्न अनुमति दिएको छ।
प्रहरीले घटनामा थप अनुसन्धान अघि बढाएको छ।