तुलसीपुर उपमहानगरपालिका वडा नं. ७ पर्सेनीस्थित तुलसीपुर–घोराही सडकखण्डमा ह्युमपाइप राख्नका लागि खनिएको खाडल बुधबार बिहान पुरिएको छ।
मोटरसाइकलमा सवार तुलसीपुर १० राईखनियानका ३५ वर्षीय चुडामणि भण्डारीको मंगलबार राति सोही खाडलमा परेर मृत्यु भएको थियो।
फोरलेन सडक निर्माण परियोजनाले गत चैततिरै ह्युमपाइप बिच्छाउन भनेर सडकको बीच भागमा वारपार खाडल खनेको थियो।
निर्माण कम्पनीले त्यस्ता खाडलमा महिनौं पहिले ह्युमपाइप झारे पनि, खाडलमा राखे पनि खाडल भने पुरेको थिएन। निर्माण कम्पनीले स्पष्ट संकेत वा चिन्ह समेत त्यसरी खनिएका ठाउँमा राखेको थिएन।
त्यही भएर त्यस्ता खाडलमा परी कैयौं मोटरसाइकल चालक दुर्घटनामा पर्ने गरेका थिए।
मंगलबार रातिको दुर्घटनाको खबर सार्वजनिक भएपछि दाङका प्रमुख जिल्ला अधिकारी रामबहादुर कुरुम्बाङले फोरलेन सडक परियोजनाको कामको जिम्मा लिएका द्रोर्ण दुलाललाई साथ लिएर दुर्घटनास्थल पुगेका थिए।
तुलसीपुर–घोराही–लमही सडकखण्डको साढे २८ किलोमिटर जति सडक विस्तारमा भारतको एक्जिम बैंकको लगानी छ। भ्याटबाहेक करिब १ अर्ब २५ करोड रूपैयाँ लागतमा निर्माण सडक विस्तार गर्ने कामको जिम्मा भारतको मुम्बईस्थित तथ्य इञ्जिनियरिङ एण्ड इन्फ्रास्ट्रक्चर प्रालिले पाएको छ।
तर, तथ्यले आधिकारिक प्रतिनिधिका रूपमा नेपालका अनुप पाण्डेलाई काम सुम्पेको छ। पेटी ठेकेदारका रूपमा सडक विस्तारको काम पाण्डेले नै गर्दै आएका थिए। पाण्डे तुलसीपुर उपमहानगरपालिकाका मेयर घनश्याम पाण्डेका छोरा हुन्।
सडक निर्माणको कामले गति लिन नसकेपछि पाण्डेले व्यापक आलोचना खेप्नु पर्यो।त्यही भएर अहिले आएर पाण्डे कामबाट 'ब्याक' भएर दुलाललाई काम सुम्पिएको जानकारहरू बताउँछन्।
दुलालले पनि अबदेखि काम आफूले नै लिएको र काम सुरू गर्ने सेतोपाटीलाई बताए।
घटनास्थल पुगेका प्रजिअ कुरुम्बाङले हालसालै काम जिम्मा लिएका दुलाललाई तत्काल ती खाडल पुर्नका लागि आग्रह गरेका थिए।
दुलालले घटनास्थलमा सर्वसाधारणसमक्ष तत्कालै भएका सडक खण्ड ह्युमपाइप बिच्छाएर पुरिने बताएका थिए। त्यसपछि बुधबारदेखि सडकखण्डमा भएका खाडल पुर्ने काम सुरू भएको छ।
यी पनि :
ह्युमपाइप राख्न खनेको खाल्डोमा परेर दाङमा मोटरसाइकल चालकको मृत्यु
तुलसीपुर-घोराही सडक विस्तार : २ वर्षमा ७ प्रतिशतमात्रै काम