बलात्कारको मुद्दामा ९ वर्ष कैद सजाय तोकिएका फरार व्यक्ति पक्राउ परेका छन्।
केन्द्रीय अनुसन्धान ब्युरोले १५ वर्षीया बालिकामाथि बलात्कार गरेको मुद्दामा फरार प्रतिवादीलाई पक्राउ गरेको प्रहरी उपरीक्षक कमल थापाले जानकारी दिए।
सिन्धुपाल्चोक घर भइ भक्तपुरको सल्लाघारी बस्ने ३८ वर्षीय च्याङ्बा भन्ने सागर तामाङ्गलाई प्रहरीले पक्राउ गरेको हो। घटनाको १० वर्षपछि बुधबार उनी सल्लाघारीबाट पक्राउ परेका थिए।
२०६८ कात्तिक २० गते उनले १५ वर्षीया बालिकालाई काठमाडौंमा राम्रो काम लगाइदिने जस्ता विभिन्न प्रलोभनमा पारेर फकाएका थिए। फकाएपछि बालिकालाई दोलालघाटबाट सँगै काठमाडौंमा ल्याएको प्रहरी उपरीक्षक थापाले बताए।
काठमाडौं पुगेपछि बालिकालाई कोटेश्वरको शुभलक्ष्मी गेष्ट हाउसमा लगेर राखे। त्यहाँ च्याङ्बाले बालिकालाई डर त्रास देखाएर जबरजस्ती करणी गरी फरार भएका थिए।
सो मुद्दामा जिल्ला अदालत काठमाडौंले उनलाई २०७१ बैशाख ५ गते ९ वर्ष कैद र १० लाख रुपैयाँ जरिवाना तोकेको थियो।
अदालतले सो रकम क्षतिपूर्तिस्वरुप पीडितलाई दिन भनेको थियो। अदालतले सजाय सुनाएपछि पनि उनी फरार थिए।
ब्युरोबाट खटिएको टोलीले भक्तपुरको सल्लाघारीबाट पक्राउ गरी फैसला कार्यान्वयनको लागि काठमाडौं अदालतमा पठाएको छ।