पर्सा जगरनाथपुर गाउँपालिका-४ का २५ वर्षीय सुनिलप्रसाद महतोलाई ठक्कर दिने टिपरका चालकलाई हिरासतमा लिइएको छ।
बा४ख ८७२५ नम्बरको टिपर चालक मकवानपुर थाहा नगरपालिका-११ का २६ वर्षीय मंगललाल सिंहलाई सवारी ज्यानसम्बन्धी कसुरमा प्रहरीले अनुसन्धान सुरू गरेको हो। उनलाई अदालतबाट थुनामा राख्ने अनुमति लिई अनुसन्धान थालिएको महानगरीय प्रहरी वृत्त गौशालाका प्रहरी नायब उपरीक्षक केशव भट्टराईले बताए।
गत बुधबार राति सवा १० बजे बागमती प्रदेश-२-०३०प ८७२५ नम्बरको नयाँ मोटरसाइकलमा सवार महतोलाई सिनामंगल चोकमा टिपरले ठक्कर दिएको थियो। महतो पठाओ राइडर थिए। महतोको उपचारका क्रममा काठमाडौं मेडिकल कलेजमा मृत्यु भएको थियो। उनीसँगै रहेका यात्रु घाइते छन्।
चालक सिंहलाई प्रहरीले त्यसैदिन कोटेश्वरबाट पक्राउ गरेको थियो।
'सवारी ज्यानमा निवेदन परेपछि हामीले हिरासतमा राखेर अनुसन्धान थालेका छौं,' भट्टराईले भने।
यस्तोमा प्रहरीले २५ दिनसम्म थुनामा राखेर अनुसन्धानपछि प्रतिवेदन जिल्ला सरकारी वकिलको कार्यालयमा बुझाउँछ।
वकिल कार्यालयले अदालतमा मुद्दा दायर गरेपछि कसुरदारको सजाय निर्धारण हुन्छ।
सवारी तथा यातायात व्यवस्था ऐन २०४५ र मुलुकी अपराध संहिता ऐन २०७४ समेतका आधारमा सर्वोच्च अदालतले सवारी ज्यान कसुरको सजाय निर्धारण सम्बन्धी मार्गदर्शन २०७५ जारी गरेको छ।
जसमा सवारी सम्बन्धी जघन्य र गम्भीर कसुरको सजाय तोकिएको छ। कसुर हेरेर सवारी ज्यानमुद्दामा जन्मकैद वा तीन वर्षसम्म सजाय हुनसक्ने व्यवस्था छ।
सवारी तथा यातायात व्यवस्था ऐनको दफा १६१ को उपदफा (१)मा ज्यान मार्ने मनसाय लिई सवारीले किचेर ठक्कर दिएकोमा घाइते भएको खण्डमा पनि कसुरदारलाई सजाय निर्धारण गर्नुपर्ने भनिएको छ। त्यस्तो कसुरमा न्यायिक स्वविवेकमा सजाय निर्धाण गर्नुपर्ने भनिएको छ।
यो पनि पढ्नुहोस्ः
बहिनीलाई बिएससी नर्सिङ पढाउने पठाओ राइडर सुनिलको सपना खोस्यो टिपरले
सुनिलप्रसाद महतो दिनभरि मोटरसाइकल वर्कसपमा काम गरेर बुधबार साँझ आफ्नो डेरा फर्केका थिए।
कलंकीस्थित उनी काम गर्ने वर्कसपबाट डेरा नजिकै थियो। उनी पुग्दा कान्छी बहिनीले कोठामा खाना पकाइसकेकी थिइन्। हत्तपत्त खाना खाएर उनी मोटरसाइकल स्टार्ट गरेर निस्किइहाले।
पर्सा, जगरनाथपुर गाउँपालिका-४ घर भएका २५ वर्षीय महतो दिनभर वर्कसप र रातको समय पठाओ राइडरको काम गर्थे।
दसैंको फूलपातीको दिन मात्रै बागमती प्रदेश-२-०३०प ८७२५ नम्बरको नयाँ मोटरसाइकल निकालेपछि उनले अतिरिक्त कमाइका लागि पठाओ राइडरको काम सुरू गरेका थिए।
बुवा प्रेमचन्द्रका अनुसार सुनिल चार वर्षदेखि काठमाडौं बस्दै आएका थिए। गाउँमा प्लस-टू पढाइ सकेर सुनिल काठमाडौं आएका थिए। यहाँ वर्कसपमा काम गर्न थालेका थिए। उनले आफ्नी कान्छी बहिनीलाई पनि यतै पढाउने भनेर ल्याएका थिए।
अहिले उनकी बहिनी बिएस्सी नर्सिङ पढ्ने तयारीमा थिइन्। ‘बहिनीलाई बिएससी नर्सिङ पढाउने भनेर रातदिन काम गरिरहेको थियो,' शुक्रबार महानगरीय प्रहरी वृत्त गौशालामा भेटिएका प्रेमचन्द्रले मलिन स्वरमा भने।
त्यस दिन साँझ घरबाट निस्केका सुनिल राति अबेरसम्म फर्केनन्। फर्किएलान् नि भनेर बहिनीले पनि राति खोजी गरिनन्।
बिहान सुनिलको मोबाइलमा फोन गर्दा पो उनले थाहा पाइन्- सुनिल त राति नै दुर्घटनामा बितिसकेछन्।
आफ्नै हातले पकाएको खाना खाएर निस्किएका दाजु बितेको त्यो अकल्पनीय खबर बहिनीका लागि आफैंमा पीडादायी थियो। साथमा त्यो घटनाले उनको बिएससी नर्सिङ पढ्ने सपना पनि भताभुंग पारिदिएको छ।
बहिनीलाई नर्सिङ पढाउने चाहना निम्ति संघर्ष गरिरहेका सुनिलका पाइला एकै रातमा रोकिए, सधैंका लागि।
अब छोरी एक्लै काठमाडौं बसेर पढ्लिन् वा नपढ्लिन् भन्नेबारे अहिले नै सोच्ने र भन्ने अवस्थामा छैनन् प्रेमचन्द्र।
प्रहरीका अनुसार त्यस रात सुनिल पछाडि यात्रु लिएर ललितपुर, टिकाथली हिँडेका थिए। सवा १० बजे सिनामंगल चोकमा टिपरले मोटरसाइकललाई ठक्कर दिएको खबर गौशाखा वृत्तमा पुगेको थियो।
वाकीटकीमै घटनाको सूचना पछ्याउँदै वृत्तको एयरपोर्टस्थित सिआरभी भ्यान सिनामंगल चोक पुग्यो। त्यहाँ सुनिल र उनीसँग रहेका यात्रु रामेछाप, दोरम्बा घर भई ललितपुर, टिकाथली बस्ने ३० वर्षीय अमर पहारी ढलिरहेका थिए।
मोटरसाइकल, चालक र यात्रु तीनतिर थिए, टिपर गायब।
सुनिल अत्यन्त गम्भीर थिए भने पहारी छटपटाइरहेका थिए। दुवैलाई उठाएर प्रहरीले काठमाडौं मेडिकल कलेजको सिनामंगलमै रहेको अस्पताल पुर्याए।
‘बिहीबार बिहानै सुनिलको उपचार क्रममा मृत्यु भयो,' वृत्तका प्रमुख प्रहरी नायब उपरीक्षक केशव भट्टराईले भने, ‘घाइतेको उपचार भइरहेको छ, उहाँको खुट्टा भाँचिएको छ।'
भट्टराईका अनुसार टिपर कोटेश्वरतर्फ गइरहेको थियो। त्यही दिशामा गइरहेको मोटरसाइकललाई टिपरले ओभरटेक गरेको थियो।
‘ओभरटेक गर्ने क्रममा टिपरको पछाडिको भागले मोटरसाइकललाई ठक्कर दिएको देखिएको छ,' भट्टराईले भने, ‘ठाउँ साँघुरो भएकाले हो वा पेल्दै लगेर ठक्कर दिएको हो, हामी अनुसन्धान गरिरहेका छौं।'
ठक्कर दिएपछि टिपर चालक रोकिएनन्। बा४ख ८७२५ नम्बरको टिपर हुँइक्याएर चालक कोटेश्वर पुगिसकेका थिए।
‘कोटेश्वरबाट टिपर समातेर ल्यायौं, चालकलाई नियन्त्रणमा राखेर सवारी ज्यानअन्तर्गतको मुद्दामा अनुसन्धान गरिरहेका छौं,' उनले भने।
आफ्नो सपना पूरा गर्न रातदिन काम गरिरहेका सुनिल बितेको खबरले बहिनी सम्हालिन सकेकी छैनन्। एक्लो छोरा बितेको खबरले उनकी आमा अर्धबेहोसी अवस्थामा छिन्।
अविवाहित जवान दाजुको मृत्युको खबर बहिनी आफैंले घरमा पुर्याएकी थिइन्। त्यसपछि बाबु प्रेमचन्द्र बिहीबार बिहानै श्रीमतीलाई लिएर पर्साबाट गाडी चढेका थिए।
‘साँझ ५ बजे आइपुगेका थियौं, त्यसपछि अस्पताल गयौं,' प्रेमचन्द्रले भने।
उनका अनुसार सुनिल र छोरी दसैंमा घर गएका थिएनन्। दाजु-बहिनीले तिहारमा घर गएर भाइटीका मनाउने योजना बनाएका थिए। ‘१७ गते आइपुग्छौं भनेका थिए,' प्रेमचन्द्रले भने।
यस बेलासम्म उनका आँखा टिपपिल भइसकेका थिए। ओठबाट स्पष्ट आवाज निस्किन छाडेको थियो।
काठमाडौंमा रातबिरात, दिउँसै पनि टिपरको आतंक छ। अनियन्त्रित र तीव्र गतिमा हुइँक्याइने टिपरका कारण सुनिलजस्ता सपना बोकेका धेरैको ज्यान राजधानीमा गइसकेको छ।
सुनिलको शव पोष्टमार्टमका लागि त्रिवि शिक्षण अस्पताल महाराजगन्जमा राखिएको छ। पोष्टमार्टम सकिएपछि मात्रै दाहसंस्कारका लागि शव आफन्तको जिम्मा लगाइने डिएसपी भट्टराईले बताए।
भट्टराईका अनुसार पठाओमा दर्ता हुँदा मोटरसाइकलको बिमा गरिएको पाइएको छ। दुर्घटनामा मृत्यु भए पाँच लाख रूपैयाँसम्म पीडित परिवारलाई उपलब्ध गराइन्छ।
यसबाहेक टिपर चालकलाई सवारी ज्यानसम्बन्धी मुद्दामा कारबाही हुन्छ। ‘हामी अनुसन्धान गरिरहेका छौं, कसुर हेरेर अधिकतम सजायका लागि अपिल गर्दछौं,' भट्टराईले भने।
प्रहरीले घटनास्थलको मुचुल्का प्रतिवेदन राखेको छ। शुक्रबार प्रेमचन्द्रले वृत्तमा सवारी ज्यानमुद्दामा जाहेरी दिएपछि घटनाको अनुसन्धान अघि बढेको भट्टराईले बताए।
‘दुर्घटना भएर पठाओ राइडरको मृत्यु भएको यो पहिलो घटना भएको बुझिन आएको छ,' भट्टराईले भने।
