युरेनियम भन्दै अवैध कारोबार गरेको आरोपमा प्रहरीले तीन जनालाई पक्राउ गरेको छ।
महानगरीय अपराध महाशाखाले तीन जनालाई टल्किने ढुंगासहित पक्राउ गरेको हो।
प्रहरीले तीन जनालई काठमाडौं महानगरपालिका वडा नम्बर १६ बालाजु बसन्तनगरस्थित गेष्ट हाउसबाट बुधबार पक्राउ गरेको हो।
नुवाकोट बिदुर नगरपालिका घर भई हाल काठमाडौं मनमैजु बस्ने ३१ वर्षीय प्रदीप घिमिरे, ३१ वर्षीय राजेन्द्र परियार र तारकेश्वर नगरपालिका फुटुङ बस्ने ३६ वर्षीय रञ्जीत कार्कीलाई प्रहरीले पक्राउ गरेको हो।
युरेनियम जस्तो टल्किने पदार्थ अवैध रूपमा कारोबार भइरहेको भन्ने सूचनाको आधारमा खटिएको टोलीले उनीहरूलाई पक्राउ गरेको प्रहरी उपरीक्षक कृष्ण पंगेनीले बताए।
'हामीलाई सूचना आएपछि हामी आफैं ग्राहक बनेर गयौं र पक्राउ गर्यौं,' उनले भने।
प्रहरीले उनीहरूबाट १२ सय ग्राम टल्किने पदार्थ बरामद गरेको छ। उनीहरूले सो पदार्थ प्रतिकिलो दुई करोडको दरले किनबेच गर्न लागेको महाशाखाले जनाएको छ।
पंगेनीका अनुसार यति धेरै मात्रामा युरेनियम पाउन सक्ने सम्भावना एकदमै न्यून भएको हुँदा यो नक्कली नै हो।
'हामीले हेर्दा त्यो युरेनियम हो जस्तो लाग्दैन तै पनि हामीले परीक्षण गर्न पठाएका छौं,' उनले भने, 'हाम्रो बुझाइमा त्यो नक्कली हो। ठगी धन्दा चलाएको हो।' उनीहरूले सो पदार्थ कहाँबाट ल्याएको हो भन्नेबारे प्रष्ट रूपमा भनेका छैनन्।'
महाशाखाले पनि यस पदार्थको परीक्षणको लागि खानी तथा भू-गर्भ विभागमा पठाउने तयारी गरेको छ।
'पहिले पनि यसरी नै ढुंगा देखाएर ठगी गरेको घटनामा त्यहीँ परीक्षण गर्न पठाएका थियौं। यो पनि यस्तै देखियो,' उनले भने।
थप अनुसन्धानको लागि उनीहरूलाई महानगरीय प्रहरी वृत्त बालाजु पठाएको छ।
