दुई वर्षअगाडि तुलसीपुरका एक जना युवकको हत्या काण्डमा संलग्न रहेकामध्ये चार जनालाई जन्मकैद (२५ वर्ष) को सजाय तोकिएको छ।
तुलसीपुर उपमहागरपालिका वडा नं. १२ कचिलीका २१ वर्षीय ‘पाटेबाघ’ भनिने रामबहादुर वलीको संगठित ज्यान मुद्दाका अभियुक्तमध्ये तुलसीपुर ११ बेलटाकुराका ‘बिक्की’ भनिने विवेकसिंह ठकुरी, सोही ठाउँका भरत शाही, रमेश केसी र शौरभ मल्ललाई जन्म कैदको फैसला भएको छ।
दाङ जिल्ला अदालतका न्यायाधीश रितेन्द्र थापाको इजलासले शुक्रबार चार जनाविरूद्ध जन्मकैदको फैसला सुनाएको अदालतका सूचना अधिकारी राजेन्द्र शर्माले सेतोपाटीलाई बताए।
अदालतले चार जनाविरूद्ध जन्मकैदको सजाय तोक्नुका साथै पीडित परिवारलाई क्षतिपूर्ति समेत उपलब्ध गराउन आदेश गरेको सूचना अधिकारी शर्माले जानकारी दिए।
वलीको २०७६ साल असार २८ गते तुलसीपुर ११ जनबहार चोकमा खुकरी, खुडा लगायतका धारिलो हतियार प्रहार गरी हत्या भएको थियो।
गम्भीर घाइते अवस्थाका वलीको उपचारका क्रममा भारतको लखनउमा असार २९ गते मृत्यु भएको थियो।
उक्त संगठित ज्यान मुद्दा अन्य पाँच जना अभियुक्तमध्ये बेलटाकुराका तेजेस पिएम (पुन मगर), अमृत वली, सुन्दर बस्नेत, सरोज बुढा मगर र शुभम शर्माको हकमा सजाय निर्धारण गर्नका लागि मंसिर २४ गते पेसी तोकिएको पनि अदालतका सूचना अधिकारी शर्माले जानकारी दिए।
‘उनीहरूको हकमा कम्तीमा पनि ३ वर्ष कैद सजाय हुन्छ,’ शर्माले भने, ‘त्योभन्दा बढी कसूर अनुसार कति सजाय तोकिन्छ २४ गते मात्रै थाहा हुनेछ।’
रामबहादुरमाथि दिनदहाडै तुलसीपुर-सितलपुर सडक अन्तर्गत जनबहादुर चोकमा भएको सांघातिक आक्रमण र हत्यापछि उनका बुवा पूर्णबहादुर वलीले नेपाल सरकारको तर्फबाट मुद्दा दायर गरेका थिए।
