लागुऔषध र लेनदेन मुद्दाका दुई फरार प्रतिवादी पक्राउ परेका छन्।
लागुऔषध मुद्दाका फरार प्रतिवादी घोराही उपमहानगरपालिका वडा नं. ३ का ४० वर्षीय टेकबहादुर नेपाली पक्राउ परेका छन्।
जिल्ला अदालतबाट लागुऔषध मुद्दामा वैशाख १५ गते दुई वर्ष कैद र एक लाख जरिवाना तोकिएपछि नेपाली फरार रहँदै आएका थिए।
गोप्य सूचनाका आधारमा लुकिछिपी बसेको अवस्थामा बुधबार प्रहरीले नेपालीलाई पक्राउ गरेको जिल्ला प्रहरी प्रवक्ता डिएसपी मुकुन्दप्रसाद रिजालले जानकारी दिए।
त्यस्तै, लेनदेन मुद्दामा घोराही ३ कै ५३ वर्षीय नैनबहादुर कामी पक्राउ परेका छन्।
जिल्ला अदालतले २०७६ साल असार ४ गते लेनदेन मुद्दामा एक वर्ष कैद सजाय तोकेको थियो। त्यसपछि फरार कामी बुधबार पक्राउ परेको प्रहरीले जानकारी दिएको छ।
दुबै जनालाई प्रहरीले शुक्रबार अदालतमा उपस्थित गराएको र अदालतको आदेशले तोकिएको सजाय भुक्तान गर्नका लागि जेल चलान गरिएको प्रहरीले बताएको छ।
