जंगली जनावरको चोरी शिकार गर्न गएका एक जनाको गोली लागेर मृत्यु भएको छ।
लमही नगरपालिका वडा नं. १ का २३ वर्षीय भाकबहादुर पुनको गोली लागेर मृत्यु भएको अवस्थामा शव फेला परेको जिल्ला प्रहरी प्रमुख एसपी सुरेश काफ्लेले बताए।
शुक्रबार राति करिब सात जनाको समूह जिल्लाको बंगलाचुली गाउँपालिका वडा नं. ८ र लमही नगरपालिका वडा नं. १ को जंगल क्षेत्रमा जंगली जनावरको शिकार गर्न भनेर गएको थियो।
त्यही क्रममा आफैंले बोकेको बन्दुक पड्किएर पुनलाई घाँटीमा लागेको र उनको घटनास्थलमै मृत्यु भएको भन्ने खुल्न आएको एसपी काफ्लेले बताए।
‘शिकार खेल्न गएकामध्ये एक जनालाई जंगलमै गोली लागेको भन्ने सूचनाको आधारमा प्रहरी घटनास्थल पुगेको थियो,’ एसपी काफ्लेले भने, ‘प्रहरी पुग्दा घाइतेको मृत्यु भइसकेको थियो।’
यसैबीच सँगै शिकार खेल्न गएकामध्ये ६ जनालाई प्रहरीले चार नाल भरुवा बन्दुकसहित पक्राउ गरेको छ। पक्राउ परेकामध्ये थप दुई जना नाबलक रहेको स्रोतले बताएको छ।
पक्राउ पर्नेहरूमा लमही नगरपालिका वडा नं. १ वसन्तपुरका २८ वर्षीय मृतक पुनका सहोदर दाइ मिनबहादुर घर्ती मगर, ४० वर्षीय जीवलाल घर्ती मगर, ४५ वर्षीय बुद्धिमान घर्ती मगर, ५० वर्षीय ओमबहादुर घर्ती मगर लगायका छन्।
एसपी काफ्लेका अनुसार रूखमा अल्झिएर बन्दुक पड्कन गई पुनलाई लागेको भन्ने बयान पक्राउ परेकाहरूले दिएका छन्।
पक्राउ परेका व्यक्तिहरूलाई जिल्ला प्रहरी कार्यालय घोराहीतर्फ ल्याउन थालिएको एसपी काफ्लेले बताए।