काठमाडौं महानगरपालिकाका मेयर बालेन शाहले कानुनले सडक र महल नहेर्ने बताएका छन्।
मंगलबार बालेनले फेसबुकमा स्टाटस राख्दै कानुन सबैका लागि बराबर हुनेमा महानगर प्रष्ट भएको बताएका छन्। यस्तै उनले सडकमा होस् वा महलमा सबैले कानुनको पालना बराबर किसिमले हुनुपर्ने बताएका हुन्।
‘नर्भिक अस्पताललाई कानुनको पालना गर्नका लागि समय दिइएको थियो,’ उनले लेखेका छन्, ‘दिइएको समयमा सुधार नभएपछि कानुनको कार्यान्वयन गर्नका लागि अनधिकृत रूपमा बनाइएका संरचना भत्काउनै पर्ने थियो।’
उनले थप लेखेका छन्, ‘तर त्यसले अस्पतालमा भर्ना भएका वा तत्कालै भर्ना हुन सक्ने बिरामीहरूलाई समस्या पर्ने भएकाले मानवीय संवेदनाका आधारमा थप समय दिइएको हो।’
उनले थप समय कति हुने भन्ने सम्बन्धमा संरचनाको स्थानान्तरणका लागि लाग्ने न्यूनतम समयले फरक पार्ने बताएका छन्। बालेनले इन्जिनियरिङ अध्ययनबाट समयसीमा तोकिने बताएका छन्।
अन्तिममा कानुनको पालना गर्दै त्यहाँ भएका अनधिकृत संरचनाहरू हटाइदिन आग्रह गरेका छन्।
कानुनको पालना नगरे महानगर पनि पछि नहट्ने उनले बताए।