धनुषामा फलाम रड प्रहार गरी काकाले आफ्नै चार वर्षीय भतिजाको हत्या गरेका छन्।
क्षीरेश्वरनाथ नगरपालिका–५ महेन्द्रनगर कुचाई टोल बस्ने किशन पासवानका छोरा चार वर्षीय अनुश पासवानलाई उनका काका २८ वर्षीय रवि पासवानले हत्या गरेको धनुषाका प्रहरी प्रवक्ता प्रहरी नायब उपरीक्षक प्रदीपबहादुर क्षेत्रीले जानकारी दिए।
उनका अनुसार रविले अनुशलाई बुधबार साँझ फलामे रड प्रहार गरी हत्या गरेका हुन्।
रडले प्रहार गरेपछि बालक गम्भीर घाइते भएका थिए। स्थानीयस्तरमै उपचारका क्रममा आधा घण्टाभित्रै बालकको मृत्यु भएको प्रहरी नायब उपरीक्षक क्षेत्रीले बताए।
घटनालगत्तै रविलाई प्रहरीले पक्राउ गरेको छ। रविलाई इलाका प्रहरी कार्यालय सखुवा महेन्द्रनगरको हिरासतमा राखेर घटना विषयमा थप अनुसन्धान भइरहेको उनले बताए।
हत्याको कारण खुल्न सकेको छैन। पारिवारिक विवादमा हत्या भएको हुनसक्ने प्रहरीको अनुमान छ।
बालकको शव परीक्षणका लागि प्रादेशिक अस्पताल जनकपुरमा राखिएको छ।
