पाल्पामा दुई जना युवाको शव फेला परेको छ। दसैंको फूलपातीका दिन रमाइलो हेर्न हिँडेका पाल्पाको निस्दी गाउँपालिका वडा नम्बर ३ झिरूबासका २१ वर्षीय वीरेन सोमै र इन्द्रबहादुर खरू तीन दिनपछि मृत भेटिएका हुन्।
गत सोमबार फूलपातीका दिन साँझ रमाइलो हेर्न भनी मित्याल मौलाथरमा एउटै मोटरसाइकलमा गएका उनीहरूको शव अलगअलग स्थानमा बुधबार फेला परेको जिल्ला प्रहरी कार्यालय पाल्पाले जनाएको छ।
वीरेनको सोही गाउँपालिका वडा नम्बर ४ मित्यालमा र इन्द्रबहादुरको वडा ५ गल्धामा शव फेला परेको हो।
इन्द्रबहादुरको शव टाउको तथा खुट्टा समेत नभएको अवस्थामा भेटिएको जिल्ला प्रहरी कार्यालय पाल्पाका प्रमुख प्रहरी उपरीक्षक जनक शाहीले जानकारी दिए।
'सोमबार हिँडेका दुई जनामध्ये एक जनाको टाउको र खुट्टा समेत काटिएको अवस्थामा शव भेटिएको छ। एक जनाको भने शव सग्लो नै छ। घटना कसरी भयो, किन भयो भन्ने यसै भन्न सकिने अवस्था छैन,' शाहीले भने।
काटिएको टाउको र खुट्टा भने फेला परेका छैनन्। प्रहरी उपरीक्षक शाहीले दुवै शवलाई रामपुर अस्पताल राखिएको जानकारी दिए।
'पोस्टमर्टम गरेर रिपोर्ट आएपछि घटनाको अनुसन्धानका लागि सहज होला। अझै पोस्टमर्टम भएको छैन। म अहिले त्यतै जाँदै छु,' शाहीले भने।
उनीहरू चढेको मोटरसाइकल समेत फेला नपरेको प्रहरी उपरीक्षक शाहीले बताए।